Jéjyang ‍ölkisi aqsu wilayitige qaratqan nishanliq yardemni kücheytidighanliqini bildürgen

Muxbirimiz erkin
2021-08-20
Share

Xitayning jéjyang ‍ölkisi Uyghur élining aqsu wilayitige qarita "Nishanliq yardem" ni kücheytidighanliqi, atalmish "Yardem türliri" ni téximu elalashturidighanliqini bildürgen. Muhajirettiki Uyghur teshkilatliri xitay ölkilirining Uyghur rayonidiki herqaysiy wilayetlerge qaratqan bu atalmish "Yardem" türini, xitayning Uyghur ilini parchilap assimilatsiye qilish we bayliqlirini bulang-talang qilish istratégiyesining bir qismi, dep eyiblep kelmekte.

"Shinjang géziti" ning xewer qilishiche, bu wedini jéjyang ‍ölkilik partkomning sékritari yüen jyajün bashchiliqidiki jéjyang wekiller ömiki 17-awghusttin 19-awghustqiche ürümchi we aqsuda ziyarette bolghanda bergen.

Xitay hökümiti 2009-yili yüz bergen ürümchi "5-Iyul qirghinchiliqi" din kéyin, "Shinjanggha nishanliq yardem bérish" namida Uyghur élining 19 wilayet we shehirini xitayning 19 ‍ölke we shehrige bölüp bergen. Xitay hökümiti atalmish "Nishanliq yardem" ning shinjangning iqtisadiy tereqqiyatigha türtke bolidighanliqini éytsimu, biraq Uyghur teshkilatliri xitayning bu arqiliq rayon'gha téximu köp xitay köchmenlirini köchürüp chiqidighanliqini, Uyghurlarni ajizlashturup, "Irqiy qirghinchiliq" qilishning asasini hazirlighanliqini ilgiri sürüp kelgen.

"Shinjang géziti" ning xewiride éytilishiche, yüen jyajün 19-awghust chén chüen'go, shoöhret zakir, wang jünjéng qatarliqlar bilen ‍ötküzülgen yighinda "Merkiziy hökümetning bir tutash orunlashturushigha egiship, yerlik we bingtu'en bilen hemkarlishidighanliqi, idiyeni üzlüksiz yéngilap, tedbirlerni elalashturup, netijini yézilarni güllendürüsh bilen mustehkemleydighanliqi" ni tekitligen. Uning éytishiche, jéjyang ölkisi "Shinjanggha bolghan sana'et yardimini chongqurlashturup, shinjanggha eqliy yardem bérishni, yéngi tereqqiyat endizisige singiship, ul esliheni kücheytishke, chégrani muqimlashturushqa, yerliktiki reqemleshtürüshni östürüshke aktip yardem béridiken."

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet