BBC Ning Uyghur mejburiy emgiki bilen munasiwetlik xewiri xitayni bi'aram qilghan

Xitayning yillardin béri dawamlashturup kéliwatqan we izchil inkar qiliwatqan mejburiy emgek jinayetliri xelq'ara taratqular teripidin ashkarilan'ghandin kéyin, xitay taratquliri bes-bes bilen hujumgha ötken.

Xitay “Yer shari waqti géziti” ning déyishiche, xitay diplomatiye ministirliqi bayanatchisi lin jyen peyshenbe küni BBC ning Uyghur mejburiy emgiki bilen ishlepchiqirilghan shoxla qiyamining en'gliyediki bir qanche talla bazirida sétilidighanliqi toghrisidiki mexsus xewirini tenqidligen.

BBC Yéqinda “Shoxla qiyami mejburiy emgek bilen ishlinemdu? talla bazarlargha tizilghan shinjang shoxla qiyamining arqa körünüshi” dégen témida bir sa'etlik höjjetlik filim élan qilghanidi. Bu filimda, eyni waqitta xitayning türmiside yatqan we mejburiy emgekke sélin'ghan 14 neper shahit we siyasiy analizchilar, soda mutexessisliri ziyaret qilin'ghan bolup, filimda xitayning xelq'aragha éksport qiliwatqan shoxla qiyamining arqisidiki Uyghur mejburiy emgek we bingtüenning qara qoli etrapliq yorutup bérilgenidi.

“Yer shari waqti géziti” ning 5-dékabir künidiki xewirige qarighanda, “Shinjang paxta jem'iyiti” bu rayonning paxta kespini qattiq qoghdash toghrisida bayanat élan qilip, yaponiyening dangliq kiyim-kéchek shirkiti “Yuniklo” (Uniqlo) ning bash ijra'iye diréktori tadashi yanayi (Tadashi Yanai) 27-noyabir küni BBC ning ziyaritini qobul qilghanda éytqan “Biz shinjangdin kelgen paxtilarni ishletmeymiz” dégen sözige reddiye bergen.

Bu, dunyagha dangliq yaponiye kiyim-kéchek shirkiti “Yuniklo” ning “Uyghur mejburiy emgikige chétishliq” dep eyiblinip kelgen nechche yildin buyan tunji qétim ochuq ipade bildürüshi iken. “Shinjang paxtisi” sewebidin yuniklogha oxshash qarshiliqqa duch kelgen shirketlerdin yene shiwétsiyening H&M shirkiti, shundaqla nayki, adidas, burbérri (Burberry) qatarliqlar bar iken.