Американиң җәнвәдики баш әлчиси мишел бачелетни уйғурлар һәққидики доклатини елан қилишқа чақирди

Мухбиримиз әркин
2022.08.26
Share on WhatsApp
Share on WhatsApp

Американиң б д т кишилик һоқуқ кеңишидә турушлуқ баш әлчиси мишел тәйлор, б д т кишилик һоқуқ алий комиссари мишел бачелетниң өз вәдисидә туруп, вәзиписидин айрилиштин илгири уйғурлар һәққидики доклатини елан қилишқа чақирған.

Мишел тәйлор твиттерда йоллиған чақириқида мундақ дигән: “мән мишел бачелетни униң ашкара вә хусусий рәвиштә, җүмлидин шәхсән маңиму бәргән вәдисигә толуқ әмәл қилип, вәзипә өтәш муддити тошуштин бурун шинҗаң тоғрисидики доклатни елан қилишқа чақиримән.” у йәнә мундақ дегән: “дуняниң шинҗаңдики кишилик һоқуқ вәзийитиниң мустәқил вә расчил шәкилдә әкс-әттүрүлишини билиш һәққи бар.”

Мишел тәйлорниң чақириқи б д т кишилик һоқуқ алий комиссари мишел бачелетниң 25-авғуст җәнвәдә өткүзгән ахбарат йиғинида, б д т ниң уйғурлар һәққидики доклатини “елан қилишқа тиришиватқанлиқи” ни ейтқандин кейин елан қилинған. Униң сөзи кишилик һоқуқ тәшкилатлирида бачелетниң мәзкур доклатни елан қилишта “хитайниң қаттиқ бесимиға учраватқанлиқ тәсирати” ни пәйда қилған. Йиғинда бачелет уйғурларни тилға алмиған, әмма мухбирларниң мәзкур доклат һәққидики суалиға җавап бәргәнда юқириқи ипадиләрдә болған.

Америка “симлиқ хәвәрләр тори” (CNN) ниң ейтишичә, мишел бачелет мухбирларға йәнә өзиниң бу доклатни “елан қилмаслиқ бесимиға учрап келиватқанлиқи” ни билдүрүп: “лекин мән һәрқандақ доклатни бесим астида елан қилмаймән яки йошурмаймән” дегән.

Буниңдин бир қанчә һәптә аввал чәт әл таратқулири хитайниң б д т кишилик һоқуқ алий комиссариға доклатни елан қилмаслиқ тоғрисида бесим ишлитиватқанлиқи, буниң үчүн хитайни қоллайдиған дөләтләрни ишқа селиватқанлиқини хәвәр қилған иди. “шинҗаң гезити” ниң хәвиридин мәлум болушичә, б д т ниң “шинҗаң доклати” ни елан қилиш-қилмаслиқ һалқилиқ бир пәйттә турған бир вақитта, хитай үрүмчидә зембабуви, сиралион, камерон, еритерийә, сомали, лиссато, котедива, гамбийә ирақ, лаус қатарлиқ әлләрни асас қилған 10 дәк дөләтниң җәнвәдә турушлуқ дипломатлирини күтивалған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.