Olimpik médaligha érishken amérika tenheriketchisi: "Uyghurlargha boluwatqan ishlardin nepretlinimiz!"

Muxbirimiz erkin
2021-10-20
Share

Amérikaning muz ‍üstide figor chiqirip téyilish türi boyiche 3 qétim olimpik altun médaligha érishken ataqliq tenheriketchisi éwéyn béytis, 2022-yilliq qishliq olimpik musabiqisigha sahipxanliq qilidighan "Xitayning Uyghurlargha tutqan mu'amilisini qorqunchluq" dep eyibligen we uningdin nepretlinidighanliqini bildürgen.

Éwéyn béytis xelq'ara olimpik komitéti 19-‍öktebir grétsiye paytexti afinada murasim ötküzüp, olimpik mesh'ilini xitayning béyjing qishliq olimpik hey'itige ötküzüp bergen, shundaqla bu weqe Uyghur we tibet teshkilatlirining naraziliqigha uchrighan küni bu sözni qilghan.

Amérika NBC qanilining xewer qilishiche, éwéyn béytis 19-öktebir béyjing qishliq olimpikige qatnishidighan amérika tenheriketchiler etritining axbarat yighinida, kishilik hoquq mesilisi xitayning qishliq olimpikqa sahipxanliq qilishigha su'al peyda qilghanliqigha baha bérishni xalaydighan-xalimaydighanliqi heqqidiki bir so'algha jawap bergen.

U mundaq digen: "Barliq tenheriketchilerge wakaliten éytqanda, men kishilik hoquq depsendichilikining nahayiti qebih bir ish ikenlikini éytalaymen."

Bu jawabning xitaygha qaritilghan-qaritilmighanliqi soralghanda, éweyn béytis mundaq dégen: "Méning jawabim omumiy kishilik hoquqqa mas kélishi mumkin, eger siz xitayda musulmanlargha néme ish boluwatqanliqini sorisingiz, bu bek qorqunchluq we wehimilik."

Éwéyn béytisning éytishiche, ular Uyghurlargha boluwatqan ishlardin nepretlinidiken. ‍U: "Méning tenheriketchiler üchün u yerde boluwatqan ishlarni sözlishimde mesile yoq. Bizmu insan, biz u yerde boluwatqan ishlarni oqughan we anglighinimizda, elwette nepretlinimiz. Biz u yerde boluwatqan ishlardin nepretlinimiz," dégen.

Axbarat yighinida xitay millitidin bolghan amérikaliq tenherketchi neytin chén we winsént jawlarmu ‍éwéyn béytisning sözlirige qoshulidighanliqini bildürgen. NBC Ning xewiride éytishiche, winsént jaw: "Tenheriketchi bolush süpitimiz bilen biz yenila adimiylikimizni saqlap qalimiz. Biz éwéynning dégenlirini angliduq. Biz uning qarishigha qoshulimiz," digen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet