“Bingtu'en” de ormanliqlarni buzup yer échish qilmishliri dawamlashmaqta

Uyghur diyaridiki yerlik xelqler teripidin “Qoralliq déhqanlar” dep atalghan ishlepchiqirish qurulush armiyisi Uyghur diyarida peyda bolghan yérim esirdin artuq waqit jeryanida asasliq derya wadiliri, su menbelirini kontrol qilip, boz yer özleshtürüsh namida yer échish jeryanida zor miqdardiki tebi'iy ormanliqlar, yaylaqlar we tarim wadisidiki toghraqliqlarning, jümlidin ékologiyilik muhitning buzghunchiliqqa uchrighanliqi yerlik xelqler teripidin izchil tenqidke uchrap kelgen idi. Ishlepchiqirish qurulush armiyisi da'iriliri yéqinqi yillardin buyan her tereplerdin kéliwatqan tenqidler tüpeylidin bir qisim polklarda sadir qilin'ghan bu xil ékologiyilik muhitni buzush qilmishlirini chekleshke kirishken.

“Bingtu'en géziti” ning bir xewiride körsitilishiche, bu yil 6-ayda ishlepchiqirish qurulush armiyisi intizam tekshürüsh komitéti 3-diwiziyesidiki bir qisim mes'ul kishilerni jazalighan bolup, ularning ichidiki 17 ademge partiye ichide agahlandurush we memuriy jaza bergen, bu yil 9-ayda bolsa, 9-diwiziyening 168-polkidiki 6 mes'ul kadirni tenqidligen. Jazagha uchrighan mezkur mes'ullarning hemmisi ormanliqni weyran qilip, qalaymiqan boz yer échip, ékologiyilik muhitni éghir derijide buzush qilmishi bilen eyiblen'gen.

Xewerdin melum bolushiche, bingtu'en 2009-yilidin buyan bir qatar qalaymiqan yer échish, ékologiyilik muhitni buzush qatarliq qilmishlarni kontrol qilishqa a'it belgilimilerni chiqirishqa mejbur bolghan bolsimu, emma bezi polklarda buninggha ri'aye qilmay, ormanliqlarni weyran qilip, boz yer échish we bashqa muhitqa ziyanliq heriketliri dawamlishiwergen.