Пуқрави җәмийәтләр антони билинкенниң хитай сәпиригә болған үмидлирини ипадилиди

Мухбиримиз әзиз
2023.02.01

Америка ташқи ишлар министири антони билинкен хитай сәпиригә меңиш алдида дуняниң һәрқайси җайлиридики пуқрави җәмийәтләрдин 50 нәччә тәшкилат өз тәләплирини бирләшмә мәктуп шәклидә йоллиди. Билинкенға әвәтилгән мәктупта улар билинкенни хитай сәпири җәрянида хитай түрмисидики сиясий мәһбусларниң әһвалини сүрүштә қилишқа чақирди.

Мәктупта һәрқайси тәшкилатлар хитай түрмисигә қамалған кишилик һоқуқ паалийәтчилири, сиясий өктичиләр, диний затлар вә хитай болмиған милләт кишилириниң тәқдирини алаһидә тәкитлигән. Шу қатарда “биз министир җанаблириға шуни йәнә бир қетим әскәртимизки, шәрқий түркистанда уйғурлар азаб чекиватиду һәмдә қирғинчилиққа учраватиду. Йеқинқи йилларда арқиму-арқидин мәлум болған түрлүк һөҗҗәтләр бу қабаһәтниң қайси дәриҗигә барғанлиқини бәкму ашкара намаян қилмақта. Бу кишиләрниң америка пуқралиқиға өткән уруқ-туғқанлириму һазир бу хил қабаһәтниң дәрдини тартмақта” дейилгән. Шу қатарда түрмидики уйғур зиялийлиридин гүлшән аббас, қурбан мамут, әхмәтҗан җүмә қатарлиқларниң исми алаһидә тәкитләнгән.

Мәктупта йәнә хитай өктичилири, тибәт сиясий мәһбуслири, хоңкоң демократлириниң қисмәтлирини әскәртиш арқилиқ нөвәттә хитайниң зулум вә бастурушлири пүтүн дуняға йейилишқа башлиғанлиқи, бундақ әһвалда давамлиқ түрдә хитай билән сода қилишниң задила әқилгә уйғун әмәслики тилға елинип: “биз сиздин лагерларни тақаш, мәҗбурий әмгәккә хатимә бериш вә барлиқ сиясий мәһбусларни қоюветишни тәләп қилсикән, дәймиз” дейилди.

Мәзкур очуқ мәктупқа америка уйғур бирләшмиси, бостон уйғур бирләшмиси, уйғур һәрикити тәшкилати, уйғур кишилик һоқуқ қурулуши тәшкилати қатарлиқ көплигән тәшкилатлар имза қойған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.