Puqrawi jem'iyetler antoni bilinkénning xitay sepirige bolghan ümidlirini ipadilidi

Muxbirimiz eziz
2023.02.01

Amérika tashqi ishlar ministiri antoni bilinkén xitay sepirige méngish aldida dunyaning herqaysi jayliridiki puqrawi jem'iyetlerdin 50 nechche teshkilat öz teleplirini birleshme mektup sheklide yollidi. Bilinkén'gha ewetilgen mektupta ular bilinkénni xitay sepiri jeryanida xitay türmisidiki siyasiy mehbuslarning ehwalini sürüshte qilishqa chaqirdi.

Mektupta herqaysi teshkilatlar xitay türmisige qamalghan kishilik hoquq pa'aliyetchiliri, siyasiy öktichiler, diniy zatlar we xitay bolmighan millet kishilirining teqdirini alahide tekitligen. Shu qatarda “Biz ministir janablirigha shuni yene bir qétim eskertimizki, sherqiy türkistanda Uyghurlar azab chékiwatidu hemde qirghinchiliqqa uchrawatidu. Yéqinqi yillarda arqimu-arqidin melum bolghan türlük höjjetler bu qabahetning qaysi derijige barghanliqini bekmu ashkara namayan qilmaqta. Bu kishilerning amérika puqraliqigha ötken uruq-tughqanlirimu hazir bu xil qabahetning derdini tartmaqta” déyilgen. Shu qatarda türmidiki Uyghur ziyaliyliridin gülshen abbas, qurban mamut, exmetjan jüme qatarliqlarning ismi alahide tekitlen'gen.

Mektupta yene xitay öktichiliri, tibet siyasiy mehbusliri, xongkong démokratlirining qismetlirini eskertish arqiliq nöwette xitayning zulum we basturushliri pütün dunyagha yéyilishqa bashlighanliqi, bundaq ehwalda dawamliq türde xitay bilen soda qilishning zadila eqilge uyghun emesliki tilgha élinip: “Biz sizdin lagérlarni taqash, mejburiy emgekke xatime bérish we barliq siyasiy mehbuslarni qoyuwétishni telep qilsiken, deymiz” déyildi.

Mezkur ochuq mektupqa amérika Uyghur birleshmisi, boston Uyghur birleshmisi, Uyghur herikiti teshkilati, Uyghur kishilik hoquq qurulushi teshkilati qatarliq köpligen teshkilatlar imza qoyghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.