Биртанийәниң, явропа иттипақидин чиқип кетиши хитайни әнсиритидикән

Биртанийә хәлқи җүмә күни биләт ташлап, явропа иттипақидин чиқип кетидиғанлиқини җакарлиғандин кейин чиққан хәвәрләргә қариғанда, аваз бериш нәтиҗиси хитайни әнсиритиши мумкин икән.

Америкидин чиқидиған “дәвр” журнилида көрситишичә, әнглийә тәрәп хитай рәиси ши җинпиңниң өткән йилдики әнглийә зияритидин сәл аввал асия мәбләғ селиш банкисиға қатнашқан вә хитай билән 60 милярд долларлиқ иқтисадий келишим түзгән. Икки тәрәп мунасивитини әнглийә баш вәзири дәйвид камерон “алтун дәвр” дәп тәриплигән.

Әнглийәдә зиярәттә болған хитай рәиси ши җинпиңму әнглийәниң “хитайға әң очуқ ғәрб дөлити” икәнликини көрсәткән вә уларниң хитайға ечилиш қарарини: “алдин көрәрлик вә истратегийәлик таллаш” дәп махтиған иди.

Һалбуки, җүмә күндики омум хәлқ биләт ташлаш һәрикитиниң нәтиҗиси мәзкур “алтун дәвр” ниң җуласини өчүргән.

Җүмә күндики нәтиҗидин кейин нөвәттики баш вәзир дәйвид камерон вәзиписидин истепа беридиғанлиқни билдүргән иди.

Мәлум болушичә, дәйвид камерон явропа иттипақиниң хитай билән болған мунасивәтлирини яхшилашқа күч чиқарған болуп, униң бу йил өктәбирдә вәзиписидин истепа бериши хитайниң әнглийә арқилиқ явропаға ечилған истратегийәлик йоли етилидикән.

Хәвәрдә мундақ көрситилгән: “хитай иқтисади астилиған вә у дуняви шерик издәватқан мушундақ бир пәйттә биртанийәниң явропа иттипақидин чиқип кетиши, хитайниң явропа иттипақи билән болған иқтисадий мунасивәтлирини аҗизлаштуриду.”

Җүмә күндики сайламдин кейин хитай ташқи ишлар министирлики әнглийә хәлқниң таллишини һөрмәт қилидиғанлиқини билдүргән болсиму, әмма бу һәқтики хәвәр хитай мәтбуатлирида көп көрүлмигән.