Chén chüen'goning sözi nöwettiki weziyetning téximu yamanlishidighanliqidin bésharet berdi

Muxbirimiz eziz
2020.06.16

Xitay hökümitining kaniyi bolghan shinxu'a agéntliqining 16-iyundiki xewiride éytilishiche, ürümchide échilghan nezeriye öginishi yighinida Uyghur aptonom rayonluq partkomning sékrétari chén chüen'go alahide söz qilip, Uyghur diyarining xitay hökümiti teshwiq qiliwatqan “Xitay chüshi” ning muhim terkibiy qismi bolidighanliqini yene bir qétim tekitligen.

Xewerde éytilishiche, chén chüen'go yighinda xitay re'isi shi jinpingning “Xitay chüshini emelge ashurush” chaqiriqigha qizghin awaz qoshushni telep qilghan. Shuningdek nöwettiki weziyetni “Yüz yildimu körülmeydighan zor tereqqiyat” dep maxtighan hemde mushundaq bir tarixiy shara'itta her sahe kishilirining “Endishe tuyghusi” ni kücheytip jenggiwar haletni saqlishi kéreklikini tekitligen.

Chén chüen'go yighinda yene alahide qilip nöwettiki zor tarixiy burulush peytide ijtima'iy muqimliq we uzun'gha sozulghan eminlikni toluq emelge ashurush, bu arqiliq iqtisadiy tereqqiyat we jem'iyetning chong jehettiki muqimliqini saqlash kéreklikini bildürgen. Shundaqla ijtima'iy muqimliqni saqlashtek zor wezipe üchün hushyarliqni qilchimu boshashturmasliq, qattiq hushyarliqni saqlash, partiye-armiye-hökümet zich hemkarlashqan halda heriket qollinish heqqide alahide yolyoruq bergen.

Analizchilar bu heqte pikir qilip, buning xitay döliti nöwette duch kéliwatqan ichki we tashqi bésimlarning inkasi ikenlikini bildürdi. Shuningdek bu hal bundin kéyinki siyasiy kontrolluqning téximu küchiyidighanliqidin bérilgen bésharet, dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.