180 Din artuq teshkilat birlikte dunyadiki dangliq markilarni Uyghurlarning mejburiy emgiki bilen yasalghan mehsulatlardin qol üzüshke chaqirdi

Muxbirimiz irade
2020-07-23
Élxet
Pikir
Share
Print

Xelq'aradiki kishilik hoquq organliri ortaq halda dunyawi kiyim-kéchek markilirini Uyghur élidiki mejburiy emgekke köz yummasliqqa chaqirghan.

En'gliyede chiqidighan "Muhapizetchi" géziti 23-iyul küni élan qilghan xewiride körsitilishiche, 180 din artuq kishilik hoquq teshkilatidin teshkillen'gen teshkilatlar birliki dunyadiki köpligen moda kiyim-kéchek markiliri we parche satquchilar milyonlighan Uyghur xelqi mejburiy emgekke séliniwatqan kishilik hoquq depsendichilikige chétishliq, dep körsetken. Ular Uyghur élide insaniyetke qarshi éghir jinayet sadir boluwatqan bolsimu, biraq herqaysi dangliq kiyim-kéchek markilirining buninggha qarimay, yenila xitayda mejburiy emgek asasida ishlepchiqirilghan paxta we paxta mehsulatlirini ishlitishni dawam qiliwatqanliqini bildürgen.

Yuqiriqi bu teshkilatlar birliki Uyghur élidiki bu zor kölemlik mejburiy emgek lagérlirini ikkinchi dunya urushidin buyan insaniyet tarixida körülgen eng zor kölemlik tutqun, dep atighan.

Ularning mölcherlishiche, yer sharidiki dangliq kiyim-kéchek markiliri paxta xam eshyasida Uyghur élini asasiy menbe qilghan bolup, dunyaning her qaysi jaylirida sétiliwatqan her besh paxta mehsulatning birini Uyghur élidiki mejburiy emgek we kishilik hoquq depsendichilikige munasiwetlik dep qarashqa bolidiken.

"Muhapizetchi" gézitining xewirige qarighanda, xitay dunyadiki eng chong paxta ishlepchiqarghuchi dölet bolup, u ishlepchiqarghan paxtining 84 pirsenti Uyghur élidin chiqidiken. Uyghur élide ishlepchiqirilghan paxta we yiplar bangladash, kambodzha we wiyétnam qatarliq döletlerdiki kiyim-kéchek zawutlirida keng qollinilidiken. U yene paxta we yip toqumichiliq we öy jahazliridimu ishlitilidiken. Bu hepte "Nyu-york waqti géziti" dunyaning herqaysi jaylirida kishiler taqawatqan maskilarningmu Uyghur élidiki mejburiy emgek asasida ishlepchiqirilghanliqini ashkarilighan idi.

Xewerde éytilishiche, kishilik hoquq organliri birleshmisi Uyghurlar mejburiy emgekke séliniwatqan teminlesh zenjirliridin mal teminleshke dawam qiliwatqan markilarning tizimlikini tizip chiqqan bolup, ular "Calvin Klein ,Gap, C&A, Adidas, Muji, Tommy Hilfiger" qatarliq markilarni öz ichige alidiken.

Yuqiriqi 180 din artuq teshkilat ichide 70 din artuq Uyghur teshkilatliri bar iken. Bu teshkilatlar birliki yene xelq'aradiki qul emgikige qarshi teshkilatlar we emgek hoquqi teshkilatliridin terkib tapqan bolup, ular özlirining birleshme bayanatida yer sharidiki dangliq markilarning hemmisining dégüdek Uyghurlar uchrawatqan mejburiy emgekke chétishliq ikenlikini eyibligen shundaqla ularni bir yil ichide mejburiy emgekke munasiwetlik barliq mehsulat we matériyallarni yoqitishqa, Uyghurlargha qaritilghan irqiy qirghinchiliq tüsidiki heriketlerde rol élishtin saqlinishqa chaqirghan.

Toluq bet