Dawid kaméronning en'gliye tashqi ishlar wezirlikige teyinlinishi ghulghula qozghidi

Washin'gtondin muxbirimiz irade teyyarlidi
2023.11.14

Xitayning “Bir belbagh bir yol qurulushi” diki bir qisim qurulush türliri üchün aktip lobichiliq qilghan en'gliyening sabiq bash weziri dawid kaméron (David Cameron) ning en'gliyening tashqi ishlar weziri qilip békitilishi küchlük ghulghula qozghimaqta.

13-Noyabir küni en'gliye bash weziri rishi sunak (Rishi Sunak) dawid kaméronni tashqi ishlar wezirlikige teyinligenlikini jakarlighan bolup, bu sunak hökümitining xitay bilen bolghan munasiwetlerni yumshitidighanliqigha da'ir perezlerni otturigha chiqarghan.

“Muhapizetchi géziti” we “Siyasiyon géziti” ning xewerlirige qarighanda, sabiq bash wezir dawid kaméron xizmitidin ayrilghandin kéyinki mezgillerde xitayning “Bir belbagh bir yol qurulushi” gha xéridar toplash üchün lobichiliq qilghan. U yene talash-tartish qozghighan sirilanka porti türige chet'el meblighi yighish üchün biwasite ottura sherqqe bérip, ikki meblegh sélish yighinida söz qilghan. Shundaqla bu yilning béshida sirilanka qirghaqlirini biwasite ziyaret qilghan.

Dawid kaméron yene qimmiti bir milyard fondstérlingliq “En'gliye-xitay meblegh sélish fondi” ning mu'awin re'islik wezipisinimu artturghan bolup, en'gliye parlaménti istixbarat we bixeterlik komitéti (ISC) bu yilning béshida dawid kaméronning mezkur wezipige teyinlinishining biwasite halda xitay hökümiti teripidin pilanlinip chiqilghanliqini tekshürüp chiqqan. Mezkur komitét eyni chaghda en'gliye hökümitini xitayning singip kirish heriketlirige toluq taqabil turalmighanliqi üchün agahlandurghan iken.

Mana mushundaq bolushigha qarimay, sabiq bash wezir dawid kaméronning emdilikte en'gliye tashqi ishlar wezirlikige teyinlinishi közetküchilerni qattiq epsuslandurghan. Dunya Uyghur qurultiyining en'gliye ishxanisi mudiri rehime mehmut xanim “X” tiki inkasida, “En'gliye hökümiti buning xitay bilen bolghan munasiwetlerni yumshitishtin dérek bermeydighanliqi heqqide derhal izahat bérishi kérek” dégen. Kishilik hoquqni közitish teshkilatining sabiq xitay ishliri diréktori sofi richardsonmu buni “Xitayning ghayet zor kishilik depsendichiliklirige köz yumidighan atalmish altun dewr” dep eyibligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.