хитай ясап чиққан сүний әқил әплиридин "терән тинтиш" (Deep Seek) әп магизинидин орун елиш билән тәңла бу һәқтики тәнқид вә ғулғула чуқанлири һәрқайси ахбарат васитилиридин орун алди.
рос андерсон (Ross Anderson) имзасида "көзәткүчи" гезитиниң 27-январ санида елан қилинған бу һәқтики обзорда ейтилишичә, аптор мәзкур әпни чүшүргәндин кейин униңдин "уйғурлар ким?" дәп сориған. "терән тинтиш" буниңға җаваб берип, уйғурларниң түркий тиллиқ хәлқ икәнлики, уларниң мол мәдәнийәт мираслириға игә икәнликини тилға алған. арқидинла хитай һөкүмити иҗра қиливатқан кишилик һоқуқ дәпсәндичиликлири түпәйлидин уйғурларниң йеқиндин буян хәлқарада зор диққәт қозғаватқан темилардин болуватқанлиқини; уйғурларниң зор тутқун, мәҗбурий әмгәк, коллектип назарәт, диний вә мәдәнийәт һәқлириниң чәклиниши қатарлиқларға нишан болуватқанлиқини әскәрткән. арқидин уштумтутла бу учурларниң һәммиси бирақла ююлуп кәткән һәмдә тездин "кәчүрүң! буниңға җаваб бериш һазирчә қолумдин кәлмәйду. башқа темилар һәққидә сөзлишәйли" дегән учурни көрсәткән.
аптор йәнә "тйәнәнмен қирғинчилиқи" һәққидә соал сориғанда, мәзкур әп йәнә охшаш шәкилдә өзиниң буниңға җаваб берәлмәйдиғанлиқини тәкитлигән. мәзкур әпни ишлитип баққанлардин җордан исимлик бир яш "қени, ши җинпиңни тәнқидләп баққин" дегәндә бу әп охшашла буниң өзи җаваб берәләйдиған даиридин һалқип кәткәнликини ейтқан. у қайтурупла "әмисә доналд трампни тәнқидләп баққин" дегәндә мәзкур әп тездин доналд трампниң онлиған "қамлашмиған" тәрәплирини қатириға тизип чиққан.
"қәбиһ хитай" намидики қолланғучи 28-январ күни "терән тинтиш" һәққидә сөз қилип, мәзкур әпниң әмәлийәттә хитай компартийәсиниң чоңқур тәсиридә икәнликини, хитайдики башқа әпләргә охшаш буниңму хитай тәшвиқати үчүн хизмәт қилидиғанлиқини әскәрткән. шундақла хитайниң һазир ғәрб дуняси тәмин әткән юқири пән-техника арқилиқ, хитай компартийәсиниң тәшвиқатини қилиш вә сахта учур тарқитиш билән мәшғул болуватқанлиқини тәкитлигән.