Amérika dölet mejlis ezaliri DeepSeek ni hökümet esliheliridin cheklesh üchün qanun layihesi tonushturdi

Amérika awam palata ezasi we dölet mejlisi istixbarat komitéti ezasi dérin laxud (Darin LaHood) we awam palata ezasi josh gottxaymér (Josh Gottheimer) xitayning sün'iy eqil munbiri bolghan DeepSeek ning hökümet esliheliride qollinilishini cheklesh üchün bir qanun layihesi tonushturghan. Ular bu heqte élan qilghan resmiy bayanatida xitay téxnika shirkitining amérika eslihelirige qarita jasusluq qilish xewpi barliqini agahlandurghan.

Dölet mejlisi tor bétide élan qilin'ghan bayanatta, dérin laxud mundaq dégen: “DeepSeek Shirkiti xitay kompartiyesige chétishliq shirket bolup, uning amérikagha élip kélidighan dölet bixeterlik tehditige sel qarashqa bolmaydu.”

Awam palata ezasi gottéymér bolsa sözide “Biz xitay kompartiyesining DeepSeek arqiliq amérika puqralirining sezgür sanliq melumatlirini oghrilighanliqigha a'it kishini endishige salidighan pakitlargha ige bolduq” dégen.

NBC Xewerler torining xewiridin qarighanda, sanliq melumat qoghdash we tor bixeterliki bilen shughullinidighan Feroot namliq tor bixeterlik shirkitining bash ijra'iye emeldari iwan tsarinniyn “DeepSeek Sün'iy eqil paranglishish détalida gherezlik yoshurun kod barliqini, uni tekshürgende uning abontlargha da'ir uchurlarni amérikada cheklen'gen we xitayning dölet igidarchiliqidiki xitay köchme xewerlishish shirkitige yolliyalaydighanliqi” ning melum bolghanliqini éytqan.

Xitay tashqi ishlar ministirliqi bolsa 6-féwral peyshenbe künidiki bayanatida buni ret qilip, “Xitay iqtisadiy we téxnika mesililirini siyasiylashturushqa qarshi turidu” dégen.

Aldinqi küni amérikadiki ABC xewerler tori amérika ana weten xewpsizliki ministirliqidin érishken bir doklatqa asasen, “Xitayda ishlen'gen we torgha ulan'ghan kaméralarning xitay hökümiti üchün jasusluq qilish yaki amérikaning halqiliq ul eslihelirini qalaymiqanlashturush iqtidarigha ige bolushi mumkinliki” heqqide xewer tarqatqan idi.

Amérikaning ximiye we énérgiye sahesini öz ichige alghan nurghun muhim ul eslihe orunlirida xitayda yasalghan nechche on minglighan kaméralar ornitilghan bolup, bu kaméralarning hel qilghuch peytlerde buzghunchiliq qilish iqtidari bolushi mumkinliki otturigha qoyulghan.