Xitay da'iriliri qaghiliq nahiyiside qanunsiz diniy pa'aliyetlerge qarshi turush teshwiqat xizmitini bashlidi

Xitay milletler we din xizmiti tor bétidin melum bolushiche, qaghiliq nahiyilik hökümet yéqindin buyan “Qanunsiz diniy pa'aliyetlerge qarshi turush xizmet pilani” we teshwiqat terbiye xizmitini nahiye miqyasi boyiche keng qanat yaydurup, nahiyidiki her qatlam, her sahediki alahazel 5000 kishini mexsus qanunsiz diniy pa'aliyetlerge qarshi turush öginish kurslirigha orunlashturghan.

Qaghiliq nahiyisi xitay hökümitining bu xil dinni cheklesh siyasiti eng küchlük yürgüzülüwatqan orunlarning biri. Ötken yil 2-ayning 28-küni qaghiliqta pichaqliq hujum qilish weqesi yüz bérip, xitaylardin 15 kishi ölgen we Uyghurlardin 7 neper hujumchi neq meydanda étip tashlan'ghan idi. Kéyin yene 1-öktebir küni herbiy gazarmigha motsiklit bilen hujum qilishqa oxshash bir qatar zenjirsiman weqeler meydan'gha kelgen.

Xitay da'iriliri shundin kéyin bu nahiyini bashqurush tedbirlirini chingitish bilen birlikte, nahiyide omumyüzlük halda milletler ittipaqliqi herikiti, qanunsiz diniy pa'aliyetlerge qarshi turush herikiti, medeniyetlik, bextlik qaghiliqlardin bolush dégendek heriketler arqiliq nahiyining weziyitini kontrol qilishqa urunup kelmekte. Emma chet'ellerdiki közetküchiler, xitay da'irilirining bu xil kontrol qilish heriketlirining Uyghur xelqining naraziliqini ashurup, weziyetni téximu keskinleshtüridighanliqini bildürmekte.