Donald tramp yuqiri baj arqiliq xitay karxanilirini méksikadin siqip chiqarmaqchi bolghan

Washin'gtondin muxbirimiz jewlan teyyarlidi
2025.01.15

Amérika döletlik radiyo shirkiti (NBC) ning 15-yanwar élan qilghan xewirige qarighanda, pirézidént donald tramp kéler hepte wezipige olturush bilenla, yuqiri tamozhna béji siyasitini ijra qilidighanliqini, shu arqiliq amérika karxanilirini güllendürüp, ish ornini köpeytidighanliqini bildürgen.

Donald tramp birinchi qétimliq wezipe ötesh mezgilide xitaydin nechche on milyard dollar tamozhna béji alghandin kéyin, köpligen xitay karxaniliri zawutlirini méksikagha yötkesh arqiliq, amérikaning tamozhna béjidin qutulghan. Méksikaning amérikagha yéqin jaylirida xitayning köpligen sana'et rayoni, aptomobil we yuqiri téxnika mehsulatliri zawutliri qurulghan, 7000 ish orni yaritilghan. 2023-Yili, xitay shirketliri 2021-yildin buyan méksikagha salghan meblighining jem'iy 4 milyard dollargha yéqin bolghanliqini élan qilghan bolup, 2024-yilning aldinqi yérimda buninggha yene, 1.4 Milyard dollar qoshulghanliqi xatirilen'gen؛ bu xitayning 2014-yildin 2020-yilghiche méksikagha salghan meblighining 4 hessisige toghra kelgen.

Xewerde éytilishiche, amérika bilen méksika arisida soda kélishimi bolup, amérikagha kirgen méksika malliridin tamozhna béji élinmaydiken. Emma donald tramp bu heqte méksikani agahlandurup, kéler hepte wezipige olturghan birinchi künila, méksikadin kiridighan mallargha tamozhna béji qoyidighanliqini jakarlighan. Xitay hökümiti hazir méksikadiki xitay shirketlirining teqdiridin ensirewatqan bolup, amérikaning yéqinda 37 xitay shirkitige émbargo qoyushi xitaygha téximu éghir zerbe bolghan. Közetchilerning qarishiche, xitaygha qarighanda méksika amérika bilen soda jehette qayta söhbetlishishke eng layiq iken.

Xewerde déyilishiche, donald tramp eger méksikagha tamozhna béji qoysa, “Amérika-méksika-kanada soda kélishimi” ge xilapliq qilghan bolidiken؛ bir qatar qanuniy tosalghulargha, shundaqla qarshi terepningmu yuqiri tamozhna béji qoyushigha uchraydiken hemde buningdin amérika shirketliri ziyan tartidiken. Emma pul-mu'amile bazirida chong dawalghush bolmaydiken. Peqet aptomobildin tartip yémek-ichmek mallirining bahasida örlesh bolidiken. Méksikadin heydilish xewpige duch kelgen xitay shirketlirining amérikada zawut qurushimu qiyin bolup, chiqim yuqiri, emgek küchi qimmet bolidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.