Дуня уйғур қурултийи: «хәлқара җәмийәтниң хитайниң уйғурларға қаратқан тизгинсиз бастурушиға қарши һәрикәт қилиш вақти кәлди»

Мухбиримиз әркин
2019-09-30
Елхәт
Пикир
Share
Принт

Дуня уйғур қурултийи хитай хәлқ җумһурийити қурулғанлиқиниң 70 йиллиқи һарписида баянат елан қилип, хәлқара җәмийәтниң хитайниң уйғурларни тизгинсиз бастуруши вә омумйүзлүк тәқиб қилишиға қарши һәрикәт қилиш вақти кәлгәнликини билдүргән.

Баянатта хитайниң уйғурларға мисли көрүлүп бақмиған сиясәтләрни йүргүзүватқан бир вақитта өзиниң 70 йиллиқини дағдуғилиқ тәбрикләватқанлиқи, хәлқара җәмийәтниң сөз билән реяллиқни айривелиши керәклики тәкитләнгән. Баянатта 3 милйондәк кишиниң лагерларға қамалғанлиқи, назарәт аппаратлириниң пүтүн уйғурларни тәқиб астиға алғанлиқи, «уйғур кимликини йоқитиш һәрикитиниң өзила бейҗиңниң сөзлирини күлкилик нәрсигә айландуруп қойғанлиқи» ни билдүргән.

Мәзкур баянат хитай һөкүмити 1‏-өктәбир күни дағдуғилиқ парат өткүзүп, дуняға өзиниң күчини көрситишкә шундақла өзиниң уйғур районидики «радикаллиққа қарши туруш тәдбирлириниң ғәлибиси» ни алаһидә гәвдиләндүрүп, башқа дөләтләрни өзидин үлгә елишқа үндәватқан мәзгилдә елан қилинди.

Баянатта дуня уйғур қурултийиниң рәиси долқун әйсаниң сөзи нәқил кәлтүрүлүп, «хитайниң дөләт ичидики бастуруш сиясити ениқ ашкариланған бир вақитта униң бу сияситиниң дунядики башқа җайларға тарқилишини тосуш хәлқара җәмийәтниң кәлгүси йиллардики вәзиписидур,» дейилгән. Баянатта тәкитлишичә, хитай тәрәққиятни өзиниң түп кишилик һоқуққа һөрмәт қилмаслиқиниң баһаниси қиливалған болсиму, лекин униң бәдилини йәнила уйғурлар өтимәктә икән.

Баянатта мундақ дейилгән: «уйғур райони йеқинқи йилларда ғайәт зор тәрәққиятқа еришкән болсиму, лекин бу адил болмиди. Иқтисади кәмситиш (уйғурлар) ниң әмгәк базириға киришигә давамлиқ тосқунлуқ қилип, уйғурларниң юқири киримдики хизмәтләргә кириши чәклинип кәлди.» Баянатта қәйт қилинишичә, хитайниң қилмишини җавабкарлиққа тартишта явропа иттипақи вә хәлқара җәмийәтниң күчлүк вә принсипал инкас қайтуруши тәләп қилинған. Шу күни йәнә америкадики «уйғур кишилик һоқуқ қурулуши» баянат елан қилип, тибәт, моңғул, тәйвән, хитай хәлқи вә хоңкоңлуқларниң хитайға қарши һәрикитини қоллайдиғанлиқини билдүргән.

Пикирләр (0)
Share
Толуқ бәт