Д у қ абдуқадир җалалидинниң тутқун қилинғанлиқи һәққидә баянат елан қилип, хитайни әйиблиди

Мухбиримиз әзиз
2018-04-23
Share

Өткән йигирмә нәччә йил мабәйнидә өзиниң йеқишлиқ язмилири билән кәң уйғур оқурмәнлириниң чоңқур һөрмитигә еришкән ғоллуқ зиялийлардин абдуқадир җалалидинниң бу йил 29-январда тутуп кетилгәнлики мәлум болди. Бу мунасивәт билән дуня уйғур қурултийи 23-апрел күни рәсмий баянат елан қилди һәмдә хитай һөкүмитиниң йолсиз қилмишини әйиблиди.

Баянатта көрситилишичә, 2018-йили 29-январда хитай дөләт аманлиқи сақчилири абдуқадир җалалидинниң өйини ахтурған, андин униң бешиға қара халта кийдүрүп елип кәткән. Әмма хитай даирилири һазирға қәдәр абдуқадир җалалидинниң "җинайити" яки униң нәдилики вә һазирқи әһвали һәққидә һечқандақ учур бәрмигән.

Баянатта абдуқадир җалалидинниң қолға елиниши өткән бирнәччә йилда бир қатар уйғур зиялийлирини арқиму-арқидин қолға елиш һәрикитиниң бир қисми икәнлики алаһидә тәкитләнгән һәмдә "хитай һөкүмитиниң уйғурларниң сәрхиллирини қолға илиш қилмишлири шәрқий түркистанда йигирмә-оттуз йилдин буян тохтап қалған әмәс," дәп көрситилгән.

Өткән һәптә бу һәқтики хәвәрләр тоғрилиқ сөз қилған д у қ ниң алий рәһбири рабийә қадир ханим, буниң һазирқи еғир сиясий вәзийәттә һечқандақ һәйран қаларлиқ иш әмәсликини, әмма абдуқадир җалалидиндәк еһтиятчан бир алимниңму сақ қалмиғанлиқидин өзиниң бәкму чөчүгәнликини билдүргән иди. У бу һәқтики баянатида "сиясийға арилашмай туруп илим саһәсидә һәқни сөзлигәнлики һәмдә хәлқниң көңүл төридин орун алғанлиқи үчүн хәлқ сөйгән бу зиялий қамаққа мәһкум болған," дәп көрсәткән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт