Хәлқара таратқулар әнглийәниң явропа иттипақидин бөлүнүп чиқиши хитайни техиму мәнпәәтләндүриду, дәп қаримақта

Бирләшмә агентлиқниң хәвиригә қариғанда, явропадики көплигән иқтисадшунаслар билән сиясий анализчилар әнглийәниң явропа иттипақидин бөлүнүп чиқишиниң хитайға техиму көп иқтисадий вә сиясий мәнпәәт елип келидиғанлиқини мөлчәрлимәктикән.

Гәрчә хитай баш министири ли кечяң әнгилийәни давамлиқ һалда явропа иттипақиниң қойнида қәп қелишқа үндигән шундақла өзиниң “бирликкә кәлгән вә муқим болған явропа иттипақи” ни көрүшни үмид қилидиғанлиқини билдүргән болсиму, әмма анализчилар хитай соқуватқан чотниң башқичә икәнликини тәкитлимәктә.

Чиңхуа университети җуңго-явропа мунасивәтлири мәркизиниң директори җаң лихуа хитай баш министири ли кечяңниң инкасиға қарши һалда мундақ дегән: “әнглийә явропа иттипақидин бөлүнүп чиққандин кейин, җуңго тәрәпниң еришидиған бир чоң пайдиси шуки, җуңго явропа иттипақи билән болған қоюқ сода вә иқтисадий мунасивәтләрни давамлаштурупла қалмастин, бәлки йәнә бүйүк биританийә падишаһлиқи билән техиму күчлүк вә техиму биваситә болған иқтисадий мунасивәтни бәрпа қилиду. Һазирқи әһвалдин елип ейтқанда, мәйли явропа иттипақи болсун вә яки әнглийә болсун, җуңго билән болған әң яхши һәмкарлиқни сақлашқа еһтияҗлиқ.”

У йәнә мундақ дегән: “явропа иттипақиниң, җүмлидин әнглийәниң җуңго билән болған иқтисадий алақиләрдики қоюқ мунасивәтлири шәк-шүбһисизки, икки тәрәпниң сиясий мунасивәтлирини техиму юмшитиду.”

Мәлум болушичә, явропа иттипақи хитайниң әң чоң иқтисадий шерики болуп, иқтисадшунасларниң көзитишичә, хитай мәбләғ салғучиларниң көп қисми явропани америкиға қариғанда техиму бихәтәр базар һесаблайдикән.