En'gliyede “Shéyin” guruhining pay chékini ammigha sétishi edliyening bahalishigha duch kélidiken

Roytéris agéntliqi (Reuters) ning 3-féwraldiki mexsus xewirige asaslan'ghanda “Uyghur qirghinchiliqini toxtitish guruppisi” en'gliyening pul-mu'amile nazaret idarisi xitayning moda kiyim-kéchek parche sétish shirkiti bolghan “Shéyin” (Shein) guruhining pay chékini ammigha sétish (IPO) ni testiqlisa, bu déloni edliye orginining bahalishigha sunidiken.

Roytérs agéntliqining 2024-yili 12-dékabirdiki mexsus xewirige asaslan'ghanda, en'gliyening pul-mu'amile nazaret idarisi xitayning moda kiyim-kéchek parche sétish shirkiti bolghan “Shéyin” guruhining pay chékini ammigha sétish (IPO) ni testiqlashning sozulup kétiwatqanliqini bildürgenidi. Shuning bilen bir waqitta en'gliye pul-mu'amile nazaret idarisining “Shéyin” ning teminlesh zenjirini nazaret qiliwatqanliqi we Uyghurlarning kishilik hoquqini qoghdash guruppilirining eyibleshliri tüpeyli “Shéyin” gha munasiwetlik qanuniy xeterni bahalawatqanliqi melum.

Tekshürüshler netijiside “Shéyin” shirkiti namida dunyaning herqaysi jaylirida keng sétiliwatqan moda kiyim-kécheklerning xelq'arada “Shinjang paxtisi” dep tonulidighan paxtida ishlepchiqirilghanliqi, bu paxtilarning bolsa Uyghurlarning mejburiy emgiki asasida térilidighanliqi éniqlan'ghanidi. Melum bolushiche, “Shéyin” guruhining 2024-yilliq tijaret sommisining 50 milyard amérika dollirigha yetkenliki mölcherlenmekte.

Amérika taratquliri, 1-féwral tramp hökümitining xitaygha qarshi yolgha qoyghan yéngi tamozhna béjining amazonning küchini qaytidin eslige keltürüp, xitay shirketliri bolghan tému we shé'inning amérikada téz sür'ette ösüshige qattiq zerbe béridighanliqini ilgiri sürmekte.