Доналд трамп: «ши җинпиң G-20 йиғиниға кәлмисә баҗниң санини техиму ашуримән!»

Мухбиримиз әзиз
2019-06-11
Елхәт
Пикир
Share
Принт

Америка билән хитай оттурисидики сода урушиниң юқири пәллигә чиқишиға әгишип, америка президенти доналд трамп 10-июн күни хитай маллириға қоюлидиған таможна беҗиниң санини техиму ашуридиғанлиқини билдүрди.

У буниңдин илгирирәк бу һәқтики сөһбәт җәрянида «хитай билән болған сода сөһбитидә бирликкә келәлмисәк таможна беҗини 300 милярд долларға өстүримиз» дегәниди.

Ройтерс агентлиқиниң 11-июндики хәвиридә ейтилишичә, доналд трамп 28-июн күни японийәниң осака шәһиридә ечилидиған G-20 йиғиниға қатнишидиған болуп, бу йиғинға америка қатарлиқ 19 дөләт вә явропа иттипақиниң рәһбәрлири қатнишидикән. У бу һәқтә мухбирларниң соаллириға җаваб берип: «ши җинпиң билән көңлимиз йеқин. Әгәр у бу қетимқи йиғинға кәлмисә хитай маллиридин елинидиған таможна беҗиниң санини ашуримән» дегән. Мәлум болушичә, һазир америка импорт қиливатқан хитай маллириға 35-40 пирсәнт таможна беҗи қоюлуватқан болуп, икки тәрәп ахирқи келишимгә келәлмисә йәнә 60 пирсәнт баҗниң қошулуши ениқ икән.

«Җәнубий хитай сәһәри гезити» ниң 11-июн санида елан қилинған бу һәқтики мақалида көрситилишичә, бу қетимқи сода уруши өткән йигирмә-оттуз йил мабәйнидә «дуня иқтисадида йеңидин баш көтүргән күч» дәп тәриплинип келиватқан хитай иқтисадиниң қайси дәриҗидики «күчлүк» ликини рошән намаян қилған: хитай дөлити бир болса американиң буйруқлирини явашлиқ билән орундиши, бир болса буни рәт қилип өзлириниң «аста тәрәққият» линийәсигә чүшүши зөрүр болуп қалған. Болупму хуавей қатарлиқ бир қатар чоң ширкәтләрниң американиң техникалири болмиғанда бирдинла ақсап қелиши хитай иқтисадидики аҗизлиқларни техиму ениқ көрсәткән. Бу һал дөләт мудапиәси, машинисазлиқ санаити, авиатсийә санаити қатарлиқ көплигән саһәләрдә охшаш икән.

Мақалида көрситилишичә, илгири кишиләр «хитай өзиниң көп тәрәплимә алаһидиликлири билән американиң сода уруши арқилиқ бесим қилишиға тақабил туруп кетәләйду» дәп қарап кәлгән. Әмма хитайдики әң чоң ширкәт болған хуавейниң тәқдири кишиләрниң бу үмидиниң қуруқ көпүктин башқа нәрсә әмәсликини испатлиған. Аптор мушу әһвалларға асасән «хитайға америкиниң шәртлирини қобул қилиштин башқа чиқиш йоли йоқ» дәп алаһидә көрситиду.

Пикирләр (0)
Share
Толуқ бәт