Галагер билән кришнаморти волкисвагенни уйғур дияридин чекинип чиқишқа чақирди

Америка авам палатаси хитай истратегийәлик риқабәт алаһидә комитетиниң рәиси майкел галагер билән бу комитетниң мәсул әзаси раҗа кришнаморти 21-феврал волкисвагенға мәктуп әвәтип, униң 2013-йилдин бери уйғур диярида мәшғулат елип бериватқан завутини тақашқа чақирған. Галагер билән кришнамортиниң волкисваген иҗраийә директори оливр блумға йезилған мәктупи, волкисваген гуруһиниң миңлиған аптомобили йеқинда америка чегра қоғдаш вә таможна идариси тәрипидин чеграда тохтитип қоюлушидин кейин йолланған. Мәлум болушичә, америка чегра қоғдаш вә таможна идариси “уйғур мәҗбурий әмгикиниң алдини елиш қануни” бойичә миңлиған аптомобилни запчаслири уйғур мәҗбурий әмгикигә четишлиқ, дегән гуман билән тохтитип қойғаниди.

Мәктупта “биз шундақла йәнә волкисвагенни америка һөкүмити, ‛хитай компартийәси уйғур вә башқа аз санлиқ милләтләргә ирқий қирғинчилиқ қилмақта‚ дәп бекиткән шинҗаңдики мәшғулатини тохтитишқа чақиримиз” дейилгән. Мәктупта тәкитлинишичә, йеқинда елан қилинған доклатлар волкисвагенниң мәҗбурий йөткәлгән уйғур әмгәк күчлирини ишлитип, һәр хил әслиһәләрни қурушта һәм башқурушта қолланғанлиқини көрсәтмәктә икән. Мәктупта йәнә волкисвагенниң хитайниң “намратлиқтин қутқузуш пирограммиси” ға қатнаштурулған уйғур әмгәк күчлирини ишләткәнлики қәйт қилиниватқанлиқини билдүргән.

Мәктупта мундақ дейилгән: “волкисвагенниң тәминләш зәнҗиридики мәҗбурий әмгәккә аит дәлилләшләр, шундақла униң шинҗаңда давамлишиватқан мәшғулатиниң түрткисидә, биз волкисвагенниң шинҗаңдики барлиқ мәшғулатлирини дәрһал тохтитишқа вә униң ‛уйғур мәҗбурий әмгикиниң алдини елиш қануни‚ ға әмәл қилиш тиришчанлиқини күчәйтишкә чақиримиз.”

 Волкисваген узундин бери кишилик һоқуқ тәшкилатлириниң үрүмчидики завутини тақаш чақириқлириға писәнт қилмай кәлгән болсиму, лекин йеқинда униң турпандики аптомобил синақ мәйдани қурулушида уйғур мәҗбурий әмгәк күчлириниң ишлитилгәнликигә даир дәлилләр уни техиму оңайсиз әһвалға чүшүрүп қойғаниди. Мәлум болушичә, галагер билән кришнаморти волкисвагенниң өзлиригә 5-марттин бурун җаваб беришини тәләп қилған.