Германийә ширкәтлири хитайдин чекинип чиқаламду?

“германийә долқунлири” ниң 26-авғусттики хәвиридә ейтилишичә, германийә һөкүмити 2023-йили өзлириниң лиңшип қалған иқтисадини гүлләндүрүш үчүн асаслиқ хам әшя, тавар вә башқа запчасларда хитайға еғир дәриҗидә тайинип қалғанлиқини етирап қилғаниди. Шуңа тәңсиз риқабәт вә “дунядики иккинчи зор иқтисадий гәвдә” дәп қариливатқан хитайдин аҗрилип чиқиш һәққидики чуқанларға қаримастин 2023-йили июлда “хитай һәққидики истратегийә” ни елан қилған болуп, сабиқ германийә рәһбири олаф шултз (Olaf Scholz) бу һәқтә тохтилип “буниңдики мәқсәт хитай билән болған бағлинишимизни бирақла үзүп ташлаш әмәс” дегән.

Шуниңдин буянқи хәлқаралиқ чуқанлар германийәни хитайға унчивала “башчилап кирмәслик” кә дәвәт қиливатқан болсиму “германийә федератип банкиси” йеқинда елан қилған санлиқ мәлуматлар һазирқи малийә сүрити давам қилса германийәниң хитайға салған биваситә мәблиғиниң 2024-йили бир һәссә ашидиғанлиқини көрсәткән. Иқтисад пәнлири пирофессори дорис фишер (Doris Fischer) бу һәқтә тохтилип “аптомобил вә химийәви мәһсулатлар саһәси буниңдики әң зор тармақлар” дәп көрсәткән.

Хәвәрдә ейтилишичә, германийә ишләпчиқарған аптомобилларниң үчтин бири хитайда сетилидикән. 2023-Йилиниң өзидила германийә 15 милярд америка доллирилиқ аптомобил вә 11 милярд америка доллирилиқ аптомобил запчаслирини хитайға маңдурған. Ройтерс агентлиқи рай синиған 566 ширкәтниң йеримидин көпрәки өзлириниң хитайға салидиған мәблиғини көпәйтиш арзусида икәнликини билдүргән. Обзорда мушу әһвал әскәртилип “әйни вақитта явропа әрзан баһалиқ хам әшяда пүтүнләй русийәгә тайинип кәлгән. Украинадики уруштин кейин явропа буниң дәрдини тартип келиватиду. Хитайға кәлгәндә германийә худди шундақ хаталиқни қайта садир қиливатиду” дәп хуласә чиқириду.