Xelq'ara zhurnalistlarni qoghdash jem'iyiti "Shinjang géziti" ning tutqundiki 4 Uyghur xadimi üchün bayanat élan qildi

Muxbirimiz shöhret hoshur
2018-09-12

Xelq'ara zhurnalistlarni qoghdash jem'iyiti ötken jüme küni bayanat élan qilip, xitay da'irilirini "Shinjang géziti" Uyghur bölümining tutqundiki 4 neper xadimini derhal qoyup bérishke chaqiriq qildi.

"Shinjang géziti" ning mu'awin bash muherriri ilham weli hemde Uyghur bölümining mes'ulliridin mirkamil tursun, memtimin obul we jür'et hajilarning namliri birmu bir tilgha élin'ghan bu bayanatta töt neper zhurnalistning qanunsiz halda tutqun qilin'ghanliqi qattiq eyiblendi.

Bayanatta mezkur teshkilatning asiya ishliri mes'uli stéwin batlér ependining munu sözliri neqil keltürüldi: "Dunyada héchqandaq bir zhurnalist 'ikki yüzlimichilik' déyilidighan bundaq müjmel we bimene qalpaq bilen jazalanmasliqi kérek."

Bayanatta déyilishiche, tutqunlar heqqidiki xewer "Erkin asiya radi'osi" da élan qilin'ghan künning etisi, yeni 7‏-séntebir küni mezkur teshkilat ürümchi sheherlik saqchi idarisi, Uyghur aptonom rayonluq partkom intizam tekshürüsh komitéti we "Shinjang géziti" idarisige fakis yollap mezkur 4 neper Uyghur xadimning ehwalini sürüshte qilghan. Xitay hökümitining mezkur organliri bu sürüshtige jawab bérelmigen, yeni ular xewerning rastliqini inkar qilalmighan.
Buning bilen 8‏-séntebir küni ular bu bayanatni élan qilghan.

Bayanatta 2017-yilning axirighiche xitay boyiche 41 neper zhurnalistning tutqun qilin'ghanliqi we bularning 15 nepirining Uyghur zhurnalistlar ikenliki eskertilgen.

Bügün yene merkizi yawro-asiya tetqiqatchilar jem'iyiti bir bayanat élan qilip, xitayning Uyghur proféssor rahile dawutni tutqun qilghanliqini eyibligen.

Nöwette milyonlarche insanning yighiwélish lagérlirida ikenlikidin özlirining xewiri barliqi we weziyetni közitiwatqanliqini bildürgen mezkur jem'iyet, eger rahile dawutning salametlikide bir mesile chiqip qalsa, buning jawabkarliqi xitay da'irilirining üstide bolidighanliqi eskertken.