Amérika tashqiy ishlar ministiri blinkén: “Hökümetlerni barliq mejburiy ghayib qilin'ghanlarni qayturup kélishke chaqirimiz”

Amérika tashqiy ishlar ministiri antoni blinkén 30-awghust “Mejburi ghayip bolghanlar xelq'‍ara küni” munasiwiti bilen bayanat élan qilip, hökümetlerni barliq mejburi ghayib qilin'ghan kishilerni qayturup kélishke, ular heqqide uchur bérishke we bu xil délolar üstidin musteqil hem terepsiz tekshürüsh élip bérishqa chaqirghan.

Bayanatta blinkén Uyghurlarning ismini tilgha almighan bolsimu, biraq u “Amérikaning mejburiy ghayib qiliwétishtek bu éghir jinayetning qurbanlirigha, tughqanlirining yoqliqidin azap ‍ichide yashawatqanlargha, ularning qeyerde ikenliki, shundaqla ularning teqdiri toghrisida uchur alalmay iztirap chékiwatqanlarning teripini tutudighanliqi” ni bildürgen.

Chet el mutexesisslirining perez qilishiche, 2017-yili bashlan'ghan chong tutqunda az dégende bir milyon 800 ming Uyghur tutqun qilinip, xitayning türme, lagérlirida ghayip bolghan. Amérika hökümiti xitayni hazirgha qeder izchil ghayib bolghan bu Uyghurlarni qoyup bérishke yaki xelq'araning musteqil tekshürüsh élip bérishigha yol qoyushqa chaqirip kelgen idi.

Blinkén bayanatida: “Amérika barliq mejburiy ghayip qiliwétishlerni qattiq eyibleydu, hökümetlerni mejburiy ghayiblarning qaytip kélishige qolayliq yaritishqa, barliq ghayiblar toghrisida uchur bérshke, shundaqla bu xil délolar üstidin musteqil we ashkara tekshürüsh élip bérishqa chaqiridu,” dégen.

Blinkénning éytishiche, “Hökümetler choqum mejburiy ghayib qiliwétishke xatime bérishi, jawabkarlarning mes'uliyitini sürüshtürüshi, ghayiblarning teqdiri we qeyerde ikenlikini ashkarlishi kérek,” iken.