Gherbning xitaygha tayinishini azaytish tirishchanliqi utuqluq dawam qilmaqta

Washin'gtondin muxbirimiz erkin teyyarlidi
2024.02.26

Amérika, yawropa ittipaqi we yaponiyening teminlesh zenjirini köp xillashturup, xitaygha tayinishni azaytish tirishchanliqida zor utuqlargha érishkenliki we buning dawamlishiwatqanliqini qeyt qilinmaqta. “Forbés” zhurnili 24-féwral élan qilghan bir maqalide körsitishiche, yéngi sanliq melumatlar dunyadiki yuqiriqi chong bazarlarning xitay bilen bolghan sodisini körünerlik azaytqanliqini körsetmektiken. Xewerde déyilishiche, xitay soda shirketliri  yuqiriqilardin bashqa  üchinchi döletke yötkilip, mehsulatlirini bu döletler arqiliq éksport qiliwatqan bolup, bu jehettiki sanliq melumatlar bir az köptürülgendek qilsimu, emma  xitaygha tayinishni azaytishning utuqluq dawam qiliwatqanliqining bir ré'alliq ikenliki bildürülgen.

“Forbés” zhurnilining qeyt qilishiche, bu sanliq melumatlardiki eng diqqet qozghaydighan nuqta, xitayning amérikagha eng köp mehsulat éksport qilidighan dölet bolushtin qélip, uning ornini méksikining igilishi bolghan. Amérika bashchiliqidiki gherbning xitay bilen bolghan gé'o-istratégiye, téxnologiye, soda mesililiridiki ixtilapliri, Uyghur, xongkong mesililirini öz ichige alghan kishilik hoquq we teywen mesililiridiki ixtilapi, xitayning xelq'ara tertipke ashkara xiris qilishi, shundaqla teminlesh zenjiridiki monopolluq ornini kozir qilip ishlitishi gherbning xitaygha tayinishni azaytishini tézletken. “Forbés” zhurnilining éytishiche, bu xil özgirishni amérikaliqlarning import qilishta bashqa menbelerge, bolupmu méksika, wiyétnam, hindistan qatarliq döletlerge yölinishi peyda qilmaqta.

Maqalida yene xitayning tamozhna da'irilirining sanliq melumatliridin neqil keltürüp, 2023-yili 11-ayghiche amérikining xitaydin yanfon import qilishi 10 pirsent, xatire kompyutérining 30 pirsent azayghanliqi bildürülgen. “Forbés” zhurnilining qeyt qilishiche, yawropa bazirining bu jehettiki sanliq melumati toluq bolmisimu, emma deslepki sanliq melumatlar ötken yili gérmaniyening xitaydin mehsulat import qilishi 13 pirsent azayghanliqi, amérikining gérmaniyege mehsulat éksport qilishta xitaydin éship ketken bolushi mumkinlikini körsetmekte iken.    

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.