Ғулҗа наһийәсидә бәш миң деһқан-чарвичи бу наһийәдики тоқумичилиқ бағчисиниң “әмгәк күчлири” гә айландурулған

Вашингтондин мухбиримиз әркин тәйярлиди
2023.09.22

Хитай һөкүмити уйғур районида мәҗбурий әмгәкниң мәвҗутлуқини рәт қиливатқан бир пәйттә, ғулҗа наһийәсидә бәш миң деһқан-чарвичиниң бу наһийәдики бир тоқумичилиқ бағчисиниң әмгәк күчлиригә айландурулғанлиқи мәлум болди. Һазир америкада яшаватқан лагер шаһитлиридин гүлзирә авулқан ғулҗа наһийәсидики мәзкур тоқумичилиқ санаәт бағчисида мәҗбурий әмгәк күчлириниң ишләйдиғанлиқи, өзиниң илгири бу санаәт бағчисидики или җовән кийим-кечәк ширкитиниң пәләй завутида мәҗбурий әмгәккә селинғанлиқини илгири сүргән. “хитай хәвәрлири тори” ниң 22-сентәбир бәргән хәвиридә ашкарилишичә, ғулҗа наһийәсигә җайлашқан 20 кивадрат километирлиқ бир тоқумичилиқ бағчисида өлчәмлик завут биналириниң қурулушиға әгишип, 5000 дин артуқ йәрлик деһқан-чарвичи санаәт ишчисиға айландурулған.

“хитай хәвәрлири тори” ниң хәвиридә, һөкүмәт билән һәмкарлишип, уйғурларни мәҗбурий әмгәккә селиш билән әйиблинип кәлгән “җовән кийим-кечәк ширкити” ниң 20 кивадрат километирлиқ мәзкур санаәт бағчисиға җайлашқанлиқи, бу ширкәтниң завутида терә пәләй, юң пәләй вә башқа рәхт пәләйләрни шималий явропа, русийә, полша, оттура асия вә башқа дөләт-районларға експорт қилидиғанлиқи ейтилған. “хитай хәвәрлири тори” ниң қәйт қилишичә, ғулҗа наһийәсидики мәзкур тоқумичилиқ бағчиси җяңсу нәнтоң гуруһиниң шинҗаңға нишанлиқ ярдәм бериш түригә асасән қурулған болуп, бу санаәт бағчиси уйғур районидики “тоқумичилиқ машинисиниң көлими әң чоң, әмгәк күчлири әң көп ишқа орунлашқан, марка үнүми әң яхши санаәт бағчиси” икән.

“хитай хәвәрлири тори” ниң 22-сентәбир бәргән рәсимлик хәвиридә завут ишчилириниң һәммисиниң уйғурлардин болуши, завутта бирму хитай ишчиниң болмаслиқи диққәт қозғимақта. Мәлум болушичә, америка сода министирлиқи илгири “җовән кийим-кечәк ширкити” ни хитай һөкүмитиниң мәҗбурий әмгәк пирограммисиға қатнишип, лагер тутқунлирини өзиниң пәләй завутида әмгәккә салғанлиқи сәвәблик қара тизимликкә киргүзгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.