Uyghur élining sherqiy jungghar iqtisadiy-téxnika tereqqiyat rayonida partlash hadisisi yüz bérip 2 kishi ölgen

Igilinishiche, 12-féwral küni Uyghur aptonom rayonining sherqiy jungghar iqtisadiy-téxnika tereqqiyat rayonigha jaylashqan yixu'a ximiye sana'iti cheklik shirkitining 5-nomurluq kaltsiy karbid péchi partlap kétip, ikki kishi neq meydanda ölgen, birqanche kishi yarilan'ghan.

Tengritagh torining xewer qilishiche, weqe yüz bergendin kéyin Uyghur aptonom rayonluq da'iriler jiddiyliship ximiye sana'iti we yéngidin kéngiyiwatqan tereqqiyat rayonlirida qattiq bixeterlik tedbirliri élishni telep qilghan. Bu heqte chén chüen'go we shöhret zakirlarning mexsus körsetme bergenliki melum.

Nöwette Uyghur aptonom rayonining mu'awin re'isi mutizap qasim mexsus ömek bilen neq meydan'gha bérip weqening sewebini tekshürmektiken.

Melum bolushiche, xitay hökümitining Uyghur aptonom rayonini tereqqiy qildurush pilanining uzun yillardin buyanqi merkiziy halqisi ürümchidin kuytun'ghiche bolghan bu belwaghqa merkezleshken iken. Bu rayonda xitay ahaliliri mutleq köp sanni teshkil qilghan bolup, bingtu'enning merkizi bolghan shixenze, néfit sana'itining asasliq bazisi bolghan qaramay, maytagh we sherqiy jungghar néfitlikliri bu belwaghqa jaylashqan. Uning üstige, bu belwagh xitay ölkiliri bilen ottura asiya ellirini tutashturidighan qatnash tügini bolup, dölet halqighan tashyol we tömüryol liniyeliri bu yerdin ötidiken.

Közetküchiler, chén chüen'go bashchiliqidiki Uyghur aptonom rayonining yuqiri derijilik emeldarlirining bu weqedin shunche jiddiyliship kétishi, bu jayning rayondiki iqtisadiy jan tomur bolghanliqi bilen munasiwetlik, dep qarimaqta.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar