Hindonéziyede musulmanlar namayish qilip, jakartaning xitay walisining istépa bérishini telep qildi

Jüme küni, hindonéziye paytexti jakartada on minglighan teqwadar musulman hindonéziye prézidént sariyining aldida namayish qilip, étnik xitay millitidin bolghan jakarta walisi basuki taja purnamaning istépa bérishni telep qilghan.

Namayishchilar basuki taja purnamaning qur'an'gha haqaret qilghanliqini ilgiri sürgen. Hindonéziye dunyadiki nopusi eng köp musulman döliti bolsimu, emma mötidil musulmanlar xéli köp salmaqni igileydu.

Roytérs agéntliqining bildürüshiche, hindonéziyede teqwadar yaki radikal musulmanlarning kichik kölemlik namayishliri da'im yüz bérip tursimu, emma bundaq zor kölemlik namayish burun köp yüz bérip baqmighan. Jüme künki namayishni “Islam qoghdighuchilar fronti” teshkilati qozghighan bolup, ular jakarta walisining “Allahgha kupurluq qilish” tin qolgha élinishini telep qilghan.

Basuki taja purnama burun hazirqi prézidénti widodo jakarta waliyliqini atqurghan mezgilde uning mu'awini bolghan.

U, nopusi 250 milyonluq musulman döliti- hindonéziye paytexti jakartaning tunji étnik xitay millitidin bolghan xristi'an walisi. U özining islahatchiliqi bilen tonulghan idi. U ilgiri özining sözidin kechürüm sorighan, emma saqchilar uning üstidin tekshürüsh bashlighan.

Hindonéziye yéqinqi 10 yildin béri ghazatchi guruhlarning hujum nishani bolup keldi. 2002‏-Yili hindonéziyening bali shehiride yüz bergen partlashta 202 adem ölgen idi.