Hindonéziye xitayning erzan bahaliq mehsulatlirigha tamozhna béji qoyushni pilanlimaqta

Uyghur élidiki irqiy qirghinchiliqni toxtitish we Uyghur mejburiy emgikini cheklesh chuqanlirigha gherbning “Siyasiy teshwiqati” dep köz yumup kelgen hindonéziye, erzan bahaliq xitay import mehsulatlirigha baj qoyushni pilanlimaqtiken. “El jezire” qanilining xewiride, hindonéziyening xitay mehsulatlirigha 200 pirsent baj qoyush pilanlawatqanliqi, uning bu pilanining amérikaning siyasitidin ilham alghanliqi qeyt qilinmaqta. Melum bolushiche, hindonéziyening xitay import mehsulatlirigha éghir tamozhna béji qoyush pilani erzan bahaliq xitay mehsulatlirining hindonéziyediki kichik kölemlik yerlik yekke igilikke jiddiy xiris qilishi sewebidin otturigha qoyulghan. Xitayning erzan bahaliq mehsulatlarni artuq ishlepchiqirish arqiliq, dunya bazirini monopol qilish taktikisi amérika we yawropa ittipaqining xitay bilen bolghan soda ixtilapidiki muhim témilarning biri bolup kelgen.

Amérika bilen yawropa ittipaqi ilgiri xitay éshincha mehsulatlirining dunya bazirigha buzghunchiliq qiliwatqanliqini köp qétim agahlandurghanidi. “El jezire” ning qeyt qilishiche, hindonéziye soda ministiri zulkifli hasan amérika-xitay soda urushi sewebidin xitay mallirining hindonéziye bazirigha éqip kirishi, hindonéziyediki kichik kölemlik yekke igiliklerning “Weyran bolush” xewpini peyda qilghanliqini éytqan. Hökümetning xitay mallirigha 200 pirsent baj qoyush pilani ayaq kiyimidin tartip, kiyim-kéchekkiche, girim buyumliridin tartip, farfur buyumlirigha bolghan keng saheni öz ichige alidiken. Hindonéziyening xitay mallirigha 200 pirsent baj qoyush pilani, xitay amérikining “Uyghur mejburiy emgikining aldini élish qanuni” din atlap ötüshte, Uyghur mejburiy emgikige chétishliq erzan bahaliq mehsulatlirini sherqiy-jenubiy asiya arqiliq, gherb bazirigha chiqiriwatqanliqi qeyt qiliniwatqan bir peytte otturigha qoyulmaqta. Xitay hindonéziyening eng chong soda shériki bolup, ötken yili ikki döletning omumi soda hejmi 127 milyard dollargha yetken. “El jezire” ning bildürüshiche, hindonéziye tamozhna béji pilanining muhim iqtisadiy tesiri bolupla qalmay, jakarta bilen béyjing otturisidiki munasiwetlergimu muhim tesiri bolidiken.