Хитай һөкүмити уйғур канада пуқраси һүсәнҗан җелилни түрмидин қоюп беришкә чақирилди

Мухбиримиз әркин
2022-03-28
Share

Канаданиң сабиқ вә һазирқи парламент әзалири, кишилик һоқуқ паалийәтчилири вә сабиқ дипломатлиридин болуп 20 дин артуқ киши хитай ташқи ишлар министири ваң йиға хәт йезип, 16 йилдин бери хитай түрмисидә наһәқ йетиватқан уйғур канада пуқраси һүсәнҗан җелилни қоюп беришкә чақирған. Мәзкур хәт канада-хитай арисидики узун йиллиқ дипломатик сүркилиш пәйда қилған һүсәнҗан җелилниң тутқун қилинишиға 16 йил толған бир вақитта йезилған.

Канададики “йәршари вә почта” гезитиниң хәвәр қилишичә, мәзкур хәткә имза қойғучилар канаданиң ирвин котлер, аллән рок, петер меккай, лавренс каннон қатарлиқ төт нәпәр сабиқ һөкүмәт министириниму ‍өз ичигә алған. 27-Март күни йезилған хәттә, һүсәнҗан җелилниң тәқдиригә даир хәвәрләрниң буниңдин 6 йил аввал пүтүнләй кесилгәнлики, “2016-йилдин бери униң қәйәрдә икәнлики, һазирқи салаһийити вә саламәтлик әһвали тоғрисида һечкимниң хәвәр аңлап бақмиғанлиқи” тәкитләнгән.

Һүсәнҗан җелил 2006-йили өзбекистанға туғқан йоқлашқа барғанда өзбекистан һөкүмити тәрипидин тутқун қилинип, хитайға өткүзүп берилгән. Хитай һөкүмити униңға “террорчилиқ” билән әйибләп өлүм җазаси берип, 2014-йили муддәтсиз қамаққа өзгәрткән. 2018-Йили униң муддәтсиз қамақ җазаси 20 йилға қисқартилғаниди.

Бу җәрянда хитай униң канада пуқраси икәнликини рәт қилип, канада дипломатлириниң униң билән көрүшүшигә йол қоймиғаниди. “йәршари вә почта” гезитиниң ейтишичә, хәттә һүсәнҗан җелилниң қоюп берилгәндә 70 яшқа йеқинлишидиғанлиқи вә кичик оғлини көрүп бақмиғанлиқи әскәртилип, “қандақ болушидин қәтийнәзәр, һөкүмитиңиз һүсәнҗан җелилни давамлиқ қамап…. . Униң һоқуқини рәт қилип кәлди. Бундақ қилиш арқилиқ һөкүмитиңиз өзиниң ички қануни, асаси қануни, шундақла хәлқара қанун вә өлчәмләрдики пикир әркинлики, диний әркинлик, һәқ-һоқуққа мунасивәтлик қаидә-түзүмләргә көз юмди” дейилгән. Мәлум болушичә, канаданиң либерал парламент әзалири өткән һәптә ташқи ишлар министири мелане җолейдин һәсәнҗан җелилниң делоси үчүн алаһидә вәкил тәйинләшни тәләп қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт