Ички моңғулда моңғул чарвичилири билән хитай көчмәнлири оттурсида йәр талишип тоқунуш йүз бәрди

Мухбиримиз меһрибан
2013.05.07

Радиомиз хитай бөлими игилигән учурлардин мәлум болишичә,өткән һәптә ички моңғулниң җиявфең шәһригә қарашлиқ баянчорға кәнтидә моңғул чарвичилири билән хитай көчмәнлири оттурсида тоқунуш йүз бәргән.

Йәр талишиш сәвәбидин келип чиққан җидәлдә йәрлик моңғуллардин йәттә киши уларниң йерини иҗаригә елип териватқан 100 дин артуқ хитай көчмән тәрипидин уруп яриландурулған.

Радиомиз зияритини қобул қилған моңғул чарвичиларниң билдүрүшичә, бу қетимқи җидәл йәрлик моңғул чарвичиларниң йерини 10 йиллиқ тохтам билән иҗаригә елип териған хитайларниң иҗарә вақти толғандин кейинму йәрни қайтуруп беришкә унимиғанлиқи сәвәбидин йүз бәргән. Радиомиз зияритини қобул қилған йәрлик сақчихана хадимлири моңғул чарвичиларни уруп яриландурған хитайларниң тутуп туруливатқанлиқини билдүргән болсиму, әмма уларға қандақ чарә көрилидиғанлиқи һәққидә җавап беришни рәт қилди.

Йеқинқи йилларда ички моңғулда йәрлик моңғуллар билән хитай көчмәнлири арисидики тоқунуш барғанчә көпәйгән болуп,2011 - йили 10 - май күни яйлақни қоғдашни тәшәббус қилған моргин исимлик чарвичи шу җайдики хитайниң көмүр кан ширкитиниң шопури тәрипидин аптомобилға қәстән бастуруветилиши сәвәбидин моңғулларниң зор көләмлик наразилиқ намайиши йүз бәргән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.