Ilham toxti Uyghur éli da'irilirining xeterlik ish qiliwatqanliqini agahlandurdi

Junggo merkizi milletler uniwérsitétining dotsénti, öktichi ziyaliy ilham toxti Uyghur élidiki aliy mektep rehberlirining yéqinda qilghan sözlirini tenqidlep, “Shinjang da'irilirining xeterlik ish qiliwatqanliqi” ni agahlandurdi.

“Shinjang géziti” ning xewer qilishiche, Uyghur aptonom rayonidiki aliy mektep rehberlirining yéqinda échilghan bir qétimliq yighinida, aliy mekteplerde siyasiy intizam, milliy bölgünchilikke qarshi küreshni kücheytish tekitlinip, siyasiy jehette layaqetsiz oqughuchilar mektep püttürüshke bolmaydighanliqi otturigha qoyulghan.

Yighinda qeshqer pédagogika institutining partkom sékrétari shu yüenji söz qilip, siyasiy jehette layaqetsiz aliy mektep rehbiri kadirliri we oqutquchilar qanchilik iqtidarliq bolushidin qet'iy nezer, choqum tertipke sélinishi kérek. Oqughuchilar qanchilik elachi bolushidin qet'iy nezer, hergiz mektep püttürüshke bolmaydu, dégen.

Shinjang pédagogika uniwérsitétining mudiri weli barat, oqughuchilar diniy kiyim kiyish, roza tutushtek diniy xahishqa yol qoymasliqni tekitligen.

Ilham toxti gérmaniye dolquni radi'osida qilghan sözide, da'irilerning Uyghur éli weziyitige xata höküm qiliwatqanliqini eskertip, bu xil kona menteqe we tepekkur ning aqmaydighanliqini bildürgen. Intérnét tereqqiy qilghan bügünki künde, da'irilerning idiye we söz erkinlikini kontrol qilish arqiliq muqimliqni saqlash pikri külkilik, dégen.