“Intérpol” ning bashliqi méng xongwéyning dolqun eysa mesilisi seweblik mollaq atqanliqi ilgiri sürülmekte

Muxbirimiz sada
2018-10-08
Share

29-Séntebir küni xitaygha qaytqandin kéyin yoqap ketken xitay dölet xewpsizliki ministirliqining sabiq mu'awin ministiri, “Intérpol”, yeni xelq'ara saqchi teshkilatining bashliqi méng xongwéyning xizmettin istépa bergenliki melum bolghan.

“Washin'gton pochtisi” gézitining tünügün, yeni 7-öktebir küni élan qilghan xewirige asaslan'ghanda, méng xongwéyning xitay hökümiti teripidin namelum jinayet bilen tekshürülüwatqanliqi ashkarilan'ghan. Shu küni “Intérpol” uning istépanamisini qobul qilghanliq heqqide bayanat élan qilghan. Bayanatta “Intérpol” ning uning istépanamisini tapshurup alghanliqi tilgha élin'ghan bolsimu, emma méng xongwéyning istépanamige mejburlash astida qol qoyghan yaki öz ixtiyari bilen imza chekkenliki eskertilmigen.

Xitayning yuqiri derijilik chiriklikke qarshi turush orgini yekshenbe küni méng xongwéyning “Qanun'gha éghir derijide xilapliq qilish” jinayiti bilen tekshürülüwatqanliqi toghrisida bir jümlilik bayanat élan qilghan. Halbuki, uning xitayning qaysi qanunigha qandaq xilapliq qilghanliqi heqqide héchqandaq tepsilat bérilmigen.

Halbuki, “Bügünki hindistan” torining bügün élan qilghan xewiride bu yil féwralda dunya Uyghur qurultiyining re'isi dolqun eysaning “Intérpol” ning “Qizil renglik tizimliki” din chiqiriwétilgenliki we xitayning bu ishqa intayin narazi bolghanliqi eskertilip ötülgen. Xewerde déyilishiche, méng xongwéy xitaygha qaytishtin ilgirila xitay hökümitining yuqiriqi weqe seweblik uni mollaq atquzushqa alliburun teyyarlinip bolghanliqi mumkin iken.

Radiyomiz bu heqte xelq'araliq taratqular tarqatqan xewerlerge asasen ötken jüme küni méng xongwéyning xitaygha qaytqandin kéyin iz-déreksiz ghayib bolghanliqi heqqide xewer bergen idi. “Bügünki hindistan” tori bügün bu heqte yéngi uchur bérip, méng xongwéyning dolqun eysa mesilisi bilen xitayda jazalinish aldida turuwatqanliqini ilgiri sürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet