Amérika iran we xitay azadliq armiyesige yardem qilghanliqi üchün yene 6 xitay shirkitini qara tizimlikke alghan

 “Jenubi xitay etigenlik pochtisi” (The South China Morning Post) gézitining 10-ayning 22-künidiki xewirige asaslan'ghanda, amérika hökümiti düshenbe küni iranning keng kölemlik qirghuchi qorallarni tereqqiy qildurushini we xitay armiyesining zamaniwilishishini qollighan alte xitay shirkitini qara tizimlikke alghanliqini élan qilghan. Bularning amérikaning dölet bixeterlikige zit heriket qilidighan shirketler ikenliki alahide tilgha élin'ghan.

 Amérika soda ministirliqining éksportni bashqurush ishlirigha mes'ul xadimi té'a rozman kéndlér mundaq dégen: “Biz, kontrolluqimizdin qéchip, amérikaning dölet bixeterlikige zit heriket qilidighan orunlarni dawamliq tosushqa tirishimiz” .

 Bu tizimlikke yene xitay shirketliridin bashqa, pakistanning 16, misirning 1, ereb birleshme xelipilikining 3 shirkiti qoshulghan.

Enxuy ölkisige jaylashqan kompyutér zapchasliri ishlepchiqarghuchi bir xitay shirkiti Uyghurlar we bashqa musulmanlargha qarshi mejburiy emgekni öz ichige alghan basturush bilen chétishliq bolghanliqi üchün 2020-yili bu tizimlikke élin'ghanidi. Bulardin bashqa yene bingtüen we bashqa birqanche xitay shirkitimu ilgiri qara tizimlikke élin'ghan.

Shuning bilen bir waqitta, amérikaning yene, xitayning öz armiyesini zamaniwilashturushta qollinidighan halqiliq özek yasash üsküniliri we zapchaslirigha érishishini cheklesh üchün bezi tedbirlerni alghanliqi melum.