Ғәрб дуняси хитайдики "ирқи қирғинчилиқ" мәсилисидә синаққа дуч кәлмәктә

Мухбиримиз җәвлан
2021-01-29
Share

Америкиниң сабиқ ташқи ишлар министири майк помпейо 19-январ хитайниң уйғурларға йүргүзүп кәлгән җинайитини "ирқий қирғинчилиқ" дәп җакарлиғандин кейин, америка башлиқ ғәрб дунясиниң "бу җинайәтни ирқий қирғинчилиқ дәп атиғандин кейин хитай билән қандақ мунасивәт бағлаш" мәсилисигә дуч келиватқанлиқи мәлум.

"вал стрет журнили" да 29-январ елан қилинған бир мақалидә америка башлиқ ғәрб дунясиниң хитайдики "ирқий қирғинчилиқ" қа һөкүм бәргәндин кейин хитай билән болидиған сиясий вә иқтисадий мунасивәтләрдә чоң синаққа дуч келидиғанлиқи оттуриға қоюлған болуп, америка биринчи болуп җакарлиған бу баянатниң ғәрб әллири билән хитай мунасивәтлиригә бәлгилик дәриҗидә тәсир көрситидиғанлиқи, виҗдан билән мәнпәәт оттурисида қандақ тоқунушларниң мәйданға келидиғанлиқи тәһлил қилинған.

Мақалидә билдүрүлүшичә, трамп һөкүмитиниң ахирқи күнләрдә хитайниң җинайитини "ирқий қирғинчилиқ" дәп җакарлишида сабиқ ташқи ишлар министири майк помпейо алаһидә рол ойниған. Йеңи ташқи ишлар министири антони билинкенму бу баянатқа аваз қошуп, "хитай һәқиқәтән ирқий қирғинчилиқ йүргүзүватиду" дегән. Әмма хитай йәнила америка билән сода қиливатқан 2-чоң иқтисадий дөләт. Әгәр америка хитай билән қайта яхшилишип қалса, "ирқий қирғинчилиқ" баянатиму күлкилик бир гәпкә айлинип қалиду. Америка вә явропа дөләтлиридики нурғун ширкәтләр хитай билән болидиған содисини үзәлмәй келиватқан болуп, "ирқий қирғинчилиқ" баянатидин кейинму бу содилирини давамлаштуридиған яки давамлаштурмайдиғанлиқи ениқ әмәс икән. Кишилик һоқуқни қоғдаймиз дәп келиватқан чоң ширкәтләрниң "ирқий қирғинчилиқ" йүргүзүватқан хитай билән сода қилиш мәсилисиму чоң синаққа дуч кәлгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт