Kristin jardin: "Uyghurlar duch kéliwatqan qirghinchiliqqa sel qarashqa bolmaydu!"

Muxbirimiz eziz
2020-07-28
Share

Xitay hökümitining Uyghurlargha qarita ijra qiliwatqan tedbirliri alliqachan "Étnik tazilash" dep étirap qilinip bolghan bolup, nöwette bu halning insaniyet tarixidiki tolimu qorqunchluq bolghan "Qirghinchiliq" xaraktérini alghanliqi barghanséri köp gherb siyasiyonlirini bu heqte pikir qilishqa ündimekte. En'gliye parlaméntining ezasi kristin jardin bu munasiwet bilen mexsus maqale élan qilip, dunya jama'itini Uyghurlar duch kéliwatqan qirghinchiliqqa sel qarimasliqqa chaqirdi.

"Shotlandiyelikler" gézitide 27-iyul küni élan qilin'ghan bu maqalida körsitilishiche, nöwette köplep melum boluwatqan Uyghurlargha da'ir uchurlar Uyghurlar duch kéliwatqan ré'alliqning alliqachan "Qirghinchiliq" sheklini élip bolghanliqini körsitidiken. Bolupmu en'gliyediki xitay elchisining minglighan Uyghur tutqunning poyiz istansisidiki xitay türmilirige yötkiliwatqan körünüsh heqqide söz qilip "Mehbuslarni yötkesh hemmila dölette bar ish" déyishi uni bekmü shürkendüriwetken.

Aptorning bayan qilishiche, yéqindin buyan lagér shahidlirining rohiy we jismaniy qiynaq heqqidiki bayanliri köplep tarqiliwatqan bolup, amérika tamozhna xadimlirining 13 tonna yalghan chachni "Lagérdikilerning béshidin chushüriwélin'ghan" dégen seweb bilen musadire qilishi ehwalning hazir qaysi derijige barghanliqini körsitip béridighan bir muhim amil iken. Uyghur ayallirini mejburiy tughmas qiliwétish heqqidiki ispatlarning otturigha chiqishi bilen ziyankeshlikning ispatliri, qirghinchiliqning pakitliri gherb dunyasini del mushu waqitta yüz bériwatqan qirghinchiliqqa qandaq mu'amilide qilishqa jiddiy chaqirmaqtiken.

Parlamént ezasi jardinning bildürüshiche, birleshken döletler teshkilati (b d t)ning iyul éyida chaqirilghan kishilik hoquq komitéti yighinida en'gliye we bashqa yigirme nechche dölet xitayning Uyghurlargha yürgüzüwatqan siyasetlirini keskin tenqid qilghan. En'gliye tashqi ishlar ministiri dominik rab bu heqtiki sözide béyjing da'irilirining Uyghurlargha qiliwatqanliridin özining "Bekmu xatirjemsizliniwatqanliqi" ni bildürgen. Yéqinda bolsa en'gliyediki erkin démokratlar partiyesi en'gliye tashqi ishlar ministirliqini xitay hökümitining qiliwatqanlirini "Uyghurlarni qirghin qilishning inzhénirliqini layihelesh" dep étirap qilishqa chaqirghan. Aptor mushu ehwallarni omumlashturup "Emdi bizning bundaq ashkara qirghinchilqqa dawamliq sel qarishimizgha héchqandaq bahane qalmidi" dep körsitidu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet