Уйғур ирқий қирғинчилиқини тема қилған чоң көләмлик хәлқара йиғин әнгилийәдә башланди

Мухбиримиз әркин
2021-09-01
Share

Хәлқарадики даңлиқ тәтқиқатчилар вә адвокатлар 1-сентәбир күни әнгилийәдики сиясийонлар һәм кишилик һоқуқ тәшкилатлири билән биллә чоң көләмлик йиғин өткүзүп, хитай һөкүмитиниң уйғурларға қаратқан ирқий қирғинчилиқи вә буни тохтитишниң йоллирини музакирә қилишқа башлиған. Әнгилийәниң ню-кәсул университетидә өткүзүлгән бу йиғин һазирға қәдәр уйғур ‍ирқий қирғинчилиқини тема қилған көләм җәһәттин әң чоң йиғин болуп һесаблинидикән.

Бирләшмә агентлиқиниң хәвәр қилишичә, үч күн давамлишидиған бу йиғинда әнгилийәлик сотчилар, парламент әзалири, уйғуршунаслар вә ирқий қирғинчилиқ мутәхәсисслирини ‍өз ичигә алған нурғун кишиләр сөз қилидикән. Улар хитай һөкүмитиниң уйғурларни нишан қилған вәһшиликлиригә, җүмлидин мәҗбури әмгәк, мәҗбури туғут чәкләш вә диний бастурушқа аит дәлилләрни, шундақла бу бастурушларни тохтитиш үчүн хәлқара һәрикәт қоллинишниң йоллирини музакирә қилидикән.

Йиғинни уюштурған ню-кәсул университетиниң тәтқиқатчиси, атақлиқ уйғуршунас җо симис финлей ханим йиғинниң ечилишида сөз қилип: "биз бу йиғинниң ноқул бир илмай паалийәт болупла қалмаслиқини үмид қилимиз. Биз йәнә бу йәрдики барлиқ кишиләрни уюштуруш арқилиқ уларниң тәҗрбиси билән тәсирини ишқа селип, хитайға қарита бесимни күчәйтишини, хитайниң уйғур хәлқигә давамлиқ зиянкәшлик қилишиға хатимә беришниң йоллири үстидә пикир йүргүзүшни үмид қилимиз," дегән.

Униң ейтишичә, уйғурлар мәсилиси "күнсери җиддийлишиватқан инсанийәт киризисидики бир чоң апәт" икән. У сөзидә йәнә германийәлик уйғуршунас адриян зензниң бу йиғинда хитайниң уйғур нупусини зорлуқ билән азайтиш пиланиға аит рәсмий һөкүмәт һөҗҗәтлирини оттуриға қоюдиғанлиқини билдүргән. Адиян зенз йеқинда мәхсус мақалә елан қилип, хитайниң 2040-йилиға қәдәр 4 йерим милйон уйғур нопусини азайтишни пиланлиғанлиқини ашкарилиған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт