"Uyghur herikiti" teshkilati "Irqiy qirghinchiliq we Uyghurlar" namliq bayanat élan qildi

Muxbirimiz nur'iman
2020-12-09
Share

Qirghinchiliq jinayiti we bu jinayetning aldini élishta hayatidin ayrilghanlarni xatirilesh hemde ulargha hörmet bildürüsh künidur. Bu munasiwet bilen "Uyghur herikiti" teshkilati "Irqi qirghinchiliq we Uyghurlar" dégen témida bayanat élan qilghan.

Bayanatta mundaq déyilgen: "Bügün xelq'araliq irqiy qirghinchiliq we ziyankeshlikke uchrighuchilarning xatirilesh hemde ulargha hörmet bildürüsh, shundaqla bu jinayetning aldini élish künidur. Bu xatirilesh insaniyet jem'iyitining eng qarangghu tereplirini eske élish we we uning tekrarlinishning aldini élish üchün wede bérishni nishan qilidu. "Uyghur herikiti" teshkilati xelq'ara jem'iyetni insaniyet tarixidiki yene bir apetning aldini élishqa chaqiridu. Uyghur xelqige yürgüzüliwatqan irqiy qirghinchiliq dawam qiliwatidu, bu téxi xatirilesh basquchigha kelmidi. Eger xelq'araliq organlar we teshkilatlar tézdin heriketke kelse, u chaghda Uyghurlar nöwette duch kéliwatqan irqi qirghinchiliqning téximu kéngiyip kétishini tosup qélish pursitimiz bolidu. "Uyghur herikiti" teshkilati amérika hökümitidin bu wehshiyliklerni éniqlash we uning aldini élishta tézdin tedbir qollinishni telep qilidu."

2020-Yili 12-ayning 9-küni xelq'araliq irqiy qirghinchiliq we ziyankeshlikke uchrighuchilarni xatirilesh we hörmet bildürüsh künidur. Bu kün yene 1948-yili élan qilin'ghan "Irqiy qirghinchiliqning aldini élish we insaniyetke qarshi jinayet sadir qilghuchilarni jazalash ehdinamisi" ning 72 yilliq xatire künidur. "Irqiy qirghinchiliqning aldini élish ehdinamisi" b d t omumiy kéngishi maqullighan tunji kishilik hoquq shertnamisidur. Bu ehdiname xelq'ara jem'iyetning insaniyetke qarshi qirghinchiliqlar "Menggü qayta yüz bermeslik" iradisini bildüridu. Bu ehdiname yene herqaysiy döletlerni we xelq'ara jem'iyetni "Irqiy qirghinchiliq" ning tunji xelq'araliq qanuniy éniqlimisi bilen teminleydu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet