«Шинҗаң җаза лагерлири» ни паш қилған хитай паалийәтчи «террорлуқ», «әсәбийлик» ни тәрғиб қилиш билән әйибләнгән

Мухбиримиз әркин
2020-01-14
Елхәт
Пикир
Share
Принт

Иҗтимаий таратқуларда «шинҗаң җаза лагерлири» ға даир учур йоллиған хитай паалийәтчи җаң бавчең «террорлуқ», «әсәбийлик» ни тәрғиб қилиш билән әйиблинип сотқа тартилған. Җаң бавчең өткән йили 4‏-июн һарписида қолға елинип, бейҗиңдики феңтәй қамақханисиға қамалғаниди.

Җаң бавчеңниң аялиниң радийомизға билдүрүшичә, даириләр йеқинда җаң бавчеңни рәсмий әйиблигән. Әйибнамидә, у 2018-вә 2019‏-йиллирида иҗтимаий таратқуларда мәзмуни хата пикирләрни йезип, дөләт рәһбәрлиригә қара сүркәйдиған, партийә-һөкүмәткә қарши, бөлгүнчиликкә алақидар, әдлийә органлирини тиллайдиған мәзмунларни йоллаш, террорлуқ, әсәбийликкә алақидар учурларни тарқитиш билән әйибләнгән. Җаң бавчеңниң аяли 14‏-январ радийомизға бәргән учурида, йолдишиниң илгири твиттирда «шинҗаң җаза лагерлири» ға даир учурларни йоллиғанлиқи, шундақла униң түрмидики бәзи хитай өктичилириниң аилисигә ярдәм қилғанлиқини билдүргән.

Америкадики «чаңша фуниң» намлиқ хитай тәшкилатиниң қурғучиси яң җәнқиң, җаң бавчеңниң илгири түрмидики хитай өктичиси хуаң чиниң анисиниң бейҗиңға келип, әрз қилишиға ярдәм қилғанлиқи, шундақла униң твиттирда «шинҗаң җаза лагерлири» ға даир учурларни йоллиғанлиқини тәкитлигән. У, 14‏-январ радийомизниң бу һәқтики зияритини қобул қилғанда, җаң бавчеңниң һәрикити хитай даирилирини биарам қилғанлиқини билдүргән. Униң тәкитлишичә, җаң бавчеңниң лагерлар һәққидики учури «һөкүмәтниң террорлуқ қилмишини паш қиливәткәнлик билән охшаш» икән.

Яң җйәнфең, «униң бу учурларни паш қилиши террорлуқ әмәс. У хитай даирилириниң шинҗаңдики қилмиш-әтмишлирини паш қилди. Бу униң зәрбә беришкә учришидики сәвәб болуши мумкин» дегән. Бу, җаң бавчениң тунҗи қетим тутқун қилинип, сотқа тартилиши әмәс. У 2013‏-йили, «йеңи пуқралар һәрикити» қозғиған һөкүмәт әмәлдарлириниң мал-мүлкини ашкарилаш паалийитигә қатнишип бир қетим қолға елинған. У шу қетимда «адәм топлап аммиви тәртипкә бузғунчилиқ қилиш» билән әйиблинип, 2 йиллиқ кесилгәниди.

Пикирләр (0)
Share
Толуқ бәт