Xelq'araliq sot jenubiy déngiz shikayitige qarap chiqti, xitay sotni bayqut qildi
Charshenbe küni ga'aga shehirige jaylashqan xelq'araliq sot filippin hökümiti xitay üstidin sun'ghan su teweliki shikayitige qarap chiqti, emma xitay terep mezkur sotni bayqut qildi.
Mezkur sot heqqide düshenbe küni bayanat bergen xitay tashqi ishlar bayanatchisi xong léy xelq'ara "Sot hökümining inawetsiz we qanunsiz" ikenlikini, ularning" Jenubiy déngiz mesilisige arilishish hoquqi yoq" liqini bildürgen idi.
Nyu-york waqit gézitining xewer qilishiche, sot hökümi kéler hepte élan qilinidighan bolup, höküm xitay da'irilirini jiddiyleshtürüshke bashlighan.
Bu heqtiki mulahizilerge qarighanda, xitayning seyshenbe küni jenubiy déngizning talash-tartishtiki parasél ariligha yéqin jayda bashlighan herbiy manéwiri shu xildiki jiddiylishishke munasiwetlik bir xil küch körsitish herikiti bolup hésablinidiken.
Melum bolushiche, xelq'ara sotning netijisi kéler seyshenbe küni élan qilinidighan bolup, xitay jenubiy déngizda bashlighan herbiy manéwir kéler düshenbe künigiche dawam qilidiken.
Xitay yéqinqi yillardin buyan jenubiy déngizingning mutleq kop qisimni "Özining" dep élan qilip, déngizgha tutishidighan filippin, birunéy, malaysiya we wiyétnam qatarliq döletlerning naraziliqini qozghighan.
Xitay yene spratél we parasél taqim aralliri tewesige bir qisim sün'iy arallarni yasighan hemde wudy ariligha radar we yerdin hawagha qoyup bérilidighan bashqurulidighan bomba orunlashturghan idi.
Bu amérika da'irilirining diqqitini qozghighan. Amérika xitayni mezkur rayonni herbiyleshtürmeslikke chaqirghan we arallarning igilik hoquqini étirap qilmaydighanliqini bildürgen.
Amérika shu munasiwet bilen kichik tiptiki urush paraxotlirini xitay yasighan sün'iy arallargha yéqin jaydin bir nechche qétim ötküzgen idi.
Xitay charshenbe küni hökümet awazi bolghan "Xelq géziti" de bash maqale élan qilip, amérikini jenubiy déngiz mesilisidin yiraq turushqa agahlandurdi.
Maqalide "Eger amérika jenubiy déngiz mesilisidin yiraq turmaydiken buning ikki terep munasiwetlirige daxili yetküzidighanliqi" körsitildi. Halbuki, amérikining buninggha qandaq inkas qayturghanliqi hazirche namelum.
- Se'udi erebistan hökümitining hemdulla weliyni xitaygha qayturidighanliqi ilgiri sürüldi
- Adriyan zénizning chamasqa su'ali: "Eger séning ata-anangmu lagérgha solan'ghan bolsa, karing bolmamti?"
- Reyhan es'et: "Inim ekberni we bashqa milyonlighan insanlarni nabut qilghanlar jawabkarliqqa tartilidighan künler choqum kélidu"
- Teywenlik sodigerning maytagh heqqidiki achchiq tesiratliri
- Xitay qazaqistan'gha herbiy arilishishni qollap, bixeterlik yardimi bérish teklipi sun'ghan
