Uyghur élidiki 78 nahiyide jinayetchilerni éléktronluq nazaret qilish sistémisi ishqa kirishtürüldi

Bügün xitaydiki qanunchiliq toridin melum bolushiche, Uyghur élidiki edliye nazariti yéqinda Uyghur élidiki 14 wilayet, 78 nahiye, bazarda jaza mudditini sirtta ötewatqanlarni tüzesh uchur merkizi qurup, ularning ornini éléktronluq sistéma arqiliq békitish, nazaret qilish ponkitlirini ishqa kirishtürgen.

Bu sistéma boyiche hazirghiche jaza mudditini sirtta ötewatqan jem'iy 4000 neperge yéqin jinayetchi nazaret astigha élin'ghan. Xitay da'iriliri mezkur sistéma sinaq teriqiside yolgha qoyulghandin tartip, jinayetchilerning qilmishini tekrarlash hadisilirining körünerlik azayghanliqini ilgiri sürgen bolsimu, emma ularning zadi qaysi jinayet katégoriyesige kiridighanliqi heqqide éniq melumat bermigen.

Dunya Uyghur qurultiyi bayanatchisi dilshat rishit bolsa, hazir Uyghur éli da'irilirining ramzan mezgilidiki muqimliqqa kapaletlik qilish nami astida öymu-öy charlash élip bérip, bixeterlik tedbirlirini qattiq chingitqanliqini, shunga éléktronluq sistéma arqiliq nazaret astigha élin'ghan bu jinayetchilerningmu siyasiy sewebler tüpeylidin türmige élin'ghan kishiler bolush éhtimalining intayin yuqiriliqini bildürmekte.