Кәлгүси президент җов байдин хитай вә һиндистанда зулум көрүватқан мусулманларниң һалиға йетишкә чақирилди

2021-01-07
Share

Американиң йеқинда вәзипә тапшуруп алидиған президенти җов байдин хитай вә һиндистан қатарлиқ дөләтләрдә зулумға учраватқан мусулманларниң әһвалиға көңүл бөлүшкә чақирилди.

Бу чақириқ "ташқи сиясәт" жорнилида американиң обама һөкүмити вә трамп һөкүмити мәзгиллиридә диний аз санлиқларға мунасивәтлик мәсилиләрдә мәслиһәтчи вәзиписиини өтигән сабиқ мәслиһәтчиси нокс теймас тәрипидин елан қилинған болуп, у бу мақалисидә мусулманларниң зиянкәшликкә учраш мәсилиси җов байдинниң әң муһим хизмәт күнтәртипиниң бири болуши керәк, дәп көрсәткән.

У мақалисдә өзиниң 20 йиллиқ тәкшүрүш вә хизмәт тәҗрибиси бойичә дуняда әң көп зулумға учрайдиғанларниң мусулманлар икәнликини, уларниң пәқәт өзлири аз санлиқ болған йәрләрдила әмәс, бәлки мусулман дөләтлиридиму кишилик һоқуқ дәпсәндичиликлиригә учрайдиғанлиқини билдүргән.

У буниңда хитай, һиндистан, берма вә сәуди әрәбистан қатарлиқ дөләтләрни алаһидә тилға алған. У хитай һәққидә тохталғанда, хитайниң ислам дини вә мусулманларға қаттиқ зиянкәшлик қиливатқанлиқини, уйғур районда қурулған 1000 дин ошуқ лагерларда аз дегәндә бир милйон уйғур мусулман барлиқини вә уларниң сақал қоюш, һарақ ичмәслик вә рози тутушқа охшаш әң әқәллий диний адәтлири үчүн зиянкәшликкә учраватқанлиқини баян қилған.

Сабиқ мәслиһәтчи нокс теймас хитайниң иқтисадий күчи сәвәблик ислам дөләтлири тәрипидин вә "ислам һәмкарлиқ тәшкилати" тәрипидинму тәнқидләнмәйватқанлиқини әскәртип, җов байдин һөкүмитиниң чоқум бу дөләтләрни җазалиши керәкликини вә буниң үчүн чоқум трамп һөкүмити қолланғандәк конкирет җаза тәдбирлирини қоллиниши керәкликини билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт