Җон кәррий хитай билән чен гуаңчеңниң түрмидики җийәни тоғрулуқ сөзлишиду

Америка, дөләт ишлар министири җон кәррийниң хитай рәһбәрлири билән кишилик һоқуқ паалийәтчиси чен гуаңчеңниң түрмидики җийәни чен кегуй тоғрулуқ сөзлишидиғанлиқини билдүрди.

Хитай өткән йили чен гуаңчеңниң америкиға чиқип кетишигә йол қойған, лекин униң җийәни чен кегуйни қолға алған иди. Даириләр униң саламәтлики хәтәрлик әһвалға берип қалған болсиму, бирақ сиртта давалинишини рәт қилған.

Америка дөләт ишлар министирлиқи муавин баянатчиси патрик вентрел чаршәнбә күни униң мәсилә һәққидә тохтилип, биз чен кегуйниң түрмидә қопал муамилә учриғанлиқи вә саламәтлик әһвали һәққидики хәвәрләрдин қаттиқ әндишә қиливатимиз, дегән. У йәнә, җон кәррийниң әһвалдин хәвәрдар икәнлики, униң буниңға көңүл бөлүватқанлиқи вә бу мәсилини давамлиқ оттуриға қоюш муддиаси барлиқини билдүргән.

Чен гуаңчең өткән йили нәзәрбәнд астидин қечип чиқип, америкиниң бейҗиңда турушлуқ әлчиханисиға киривалған. Бу вәқә өз ватида америка - хитай мунасивитидә дипломатик кризис кәлтүрүп чиқарған иди.

Чен гуаңчең җийәниниң мәсилисигә б д т ниң арилишишини тәләп қилип, әгәр чен кегуйни дәрһал давалимиса, униң өлүп қелиши мумкинликини билдүргән.

Патрик вентрелниң ашкарилишичә, җон кәррий чен кегуйниң мәсилиси тоғрулуқ хитай рәһбәрлири билән телефонда сөзлишишни қарар қилған. Бирақ вентрел униң қачан сөзлишидиғанлиқидин хәвири йоқлуқини билдүргән.