Uyghur rayoni emeldarliri “Jungxu'a milliti ortaq éngi” ni shekillendürüshke paydisiz herqandaq ishni tosushni tekitligen

Uyghur rayonida, xitay re'isi shi jinpingning jenubiy afriqada ötküzülgen “Kések döletliri” bashliqlar yighinidin qaytishida ürümchide toxtap ötkende bergen “Shinjangni bashqurush istratégiyesi” ni dawamliq ijra qilish heqqidiki yolyoruqini emeliyleshtürüsh qizghinliqi kötürülgen. Xitay taratqulirining xewer qilishiche, nöwette rayondiki yerlik emeldarlar shi jinpingning “Yolyoruqi” gha bes-beste ipade bildürmekte iken. Uyghur aptonom rayonluq ma'arip nazaritining naziri xitay tilini omumlashturush we “Jungxu'a milliti ortaq éngi” berpa qilishta qet'iy tewrenmey mangidighanliqini éytqan. Tarbaghatay wilayetlik birliksep bölümining bashliqi, “Jungxu'a milliti ortaq éngi” berpa qilishqa paydisiz herqandaq ishni tosidighanliqini bildürgen.

Nöwette, shi jinpingning ürümchide bergen “Yolyoruqi” din kéyin, uning amérika hökümiti we bezi gherb parlaméntliri teripidin “Irqiy qirghinchiliq” dep eyiblen'gen “Shinjang siyasiti” ning buningdin kéyin téximu radikal tüs élishidin endishe qilinmaqta.

Shi jinping 26-awghust küni ürümchide Uyghur aptonom rayoni we “Shinjang ishlepchiqirish-qurulush bingtüeni” ning xizmet doklatini anglighandin kéyin, rayonda “Jungxu'a milliti ortaq éngi” berpa qilishni téximu mustehkemleshni, xitay tilini kücheytishni, téximu köp kishilerni xitayning ichkiri ölkilirige xizmetke yötkeshni, rayonning “Xitay omumiy dölet weziyitidiki istratégiyelik ornini téximu chongqur tonup yétish” ni telep qilghan.

“Shinjang géziti” ning 29-awghust xewer qilishiche, Uyghur aptonom rayonluq ma'arip nazaritining naziri zulhayat isma'il, ma'arip nazariti shi jinpingning hawalisi bilen “Dölet ortaq tilining qanunda belgilen'gen teleplirini tewrenmey yolgha qoyup, uning jem'iyette téximu keng omumlishishini dawamliq kücheytidu. Uning omumlishish derijisi we süpitini yuqiri kötürüp, ‛beshni étirap qilish‚ ni kücheytidu. ‛jungxu'a milliti ortaq éngi‚ ni mustehkemlep, shinjangni medeniyet arqiliq ozuqlandurushni algha sürüshke töhpe qoshidu” dégen.

Tarbaghatay wilayetlik partkom birliksep bölümining bashliqi jarqin janburbék “Herqandaq ishta jungxu'a milliti ortaq éngini shekillendürüshni asas qilish” ni, uninggha “Paydisiz herqandaq ishtin qet'iy saqlinish kérekliki” ni tekitligen.