Jastin trudo yene bir qétim Uyghurlar tüpeylidin hujum nishanigha aylandi

Uyghur diyaridiki mejburiy emgekning kölimi we derijisi heqqidiki eng yéngi uchurlarning köplep ashkara bolushi bilen bu xil “Zamaniwi qullar emgiki” ning mehsulatlirigha asasliq bazar boluwatqan gherb dunyasida bu mallarni cheklesh herikiti barghanséri yuqiri pellige chiqishqa bashlidi. Kanada bash ministiri jastin trudo 30-mart küni bayanat élan qilip, özlirining bu xil mejburiy emgek mehsulatlirini cheklesh qararini ikkilenmestin dawam qilidighanliqini bildürdi.

Kanadaning eng chong gézitliridin bolghan “Yer shari pochtisi” gézitining 30-marttiki xewiride éytilishiche, nöwette kanada bazarlirida sétiliwatqan löngge, yotqan kirlikliri we kiyim-kécheklerning köp qismi Uyghur diyaridiki paxta mehsulatlirigha chétishliq mejburiy emgekning mehsulatliri iken. Bash ministir jastin trudo mushu ehwallarni közde tutup “Biz emeliy heriketke öttuq. Shuningdek mushu arqiliq kanada shirketlirining menbesi gumanliq bolghan teminat zenjirlirige chétilip qalmasliqini, bu shirketlerningmu özini ayishini istimektimiz” dégen.

Xewerde éytilishiche, 2021-yilining béshida kanada hökümiti xitaydiki mejburiy emgekke baghlinishliq bolghan mehsulatlarni import qilmasliq, kanada shirketliri mejburiy emgek bilen alaqidar soda pa'aliyetlirige ishtirak qilmasliq, shuningdek kanada tashqi soda importining mejburiy emgekni asas qilghan teminat zenjirige shérik bolup qélishigha yol qoymasliq dégendek bir qatar qararlarni alghan iken. Kanadadiki yene bir qisim siyasi'iyonlar bolsa “Kanada hökümiti xitaydin import qiliniwatqan barliq paxta we pemidur (shoxla) mehsulatlirini men'i qilishi lazim” dep körsetken.

“Mikrosoft xewerliri” ning 30-marttiki xewiride éytilishiche, jastin trudo birleshken döletler teshkilati (b d t) ning bash shitabidiki muxbirlarni kütüwélish yighinida yene bir qétim Uyghurlar heqqide uzun söz qilghan. U sözide “Shinjangda hazir boluwatqan ishlarning éghirliqidin bekla teshwishlenmektimiz. Xitay hökümiti buninggha tézdin jawab bérishi lazim” dep körsetken hemde özining xitaygha qaritilghan jaza tedbirlirini qizghin qollaydighanliqini bildürgen.

Emma bash ministir jastin trudoning sözliri tarqilip uzun ötmeyla braziliyening r'odi-zhanéyro shehiridiki xitay konsulxanisining bash konsuli li yang tiwéttérda uchur yollap ; “Yigit! nechche waqittin buyan qilghan-etkenliring peqet xitay-kanada munasiwitini buzush hemde kanadani amérikaning ghalchisigha aylandurush boldi” dep, uninggha haqaret qilghan. Xelq'aradiki her sahe kishiliri bolsa buni xitayning diplomatiye sahesidiki kalwalarche meghlubiyetning yene bir qétim ashkarilinishi, dep qarimaqta iken.