Җәнуби корейәниң муһапизәтчи парахоти хитай белиқчи кемилиригә қаритип агаһландуруш оқи чиқарған

Җәнуби корейәниң деңиз муһапизәтчилири түнүгүн өзиниң деңиз тәвәликидә чарлаш елип бериватқанда хитайниң 44 данә белиқчи кемисиниң җәнубий корейә деңиз территорийәсигә үсүп киргәнликини байқиған. Буниң билән җәнуби корейәниң деңиз чарлаш қисми хитай белиқчи кемилиригә ара-арқидин агаһландуруш оқи атқан.

Ройтерз агентлиқиниң бүгүнки бу һәқтики хәвиридә дейилишичә, җәнубий корейә тәрәп хитай кемилири толуқ чекингәнгә қәдәр җәмий 239 пай оқ атқан. Бүгүн хитай ташқи ишлар министирлиқиниң баянатчиси хуа чүнйиң, бу һәқтә инкас қайтуруп, “биз җәнуби корейәниң бу мәсилини мувапиқ йосунда һәл қилишини, йәни қанун иҗра қилғанда авамниң бихәтәрлики үчүн һәддидин артуқ тәдбир қолланмаслиқини үмид қилимиз,” дегән.

Җәнуби корейәниң ташқи ишлар министирлиқиму бу һәқтә баянат берип, корейә деңиз муһапизәтчи қисимлириниң корейә деңиз тәвәликигә үсүп кирип, еғир һалда қанунсизлиқ қилғанларға қарита тегишлик тәдбир қолланғанлиқини, қорал ишлитиштә қануний даиридин һалқимиғанлиқини баян қилған.

Ройтерз агентлиқиниң хәвиридә әскәртилишичә, өткән йили сентәбирдиму мушуниңға охшашрақ бир вәқә йүз бәргән. Шу қетимлиқ вәқәдә хитай белиқчилиридин үч киши өлгән.