Lagérdiki tutqunlarning ghulja nahiyisidiki kiyim-kéchek ishlepchiqirish bazisida emgekke séliniwatqanliqi ilgiri sürüldi

Ghulja nahiyisidiki “Jyafang kiyim-kéchek mehsulatliri baghchisi” namliq ishlepchiqirish bazisida lagérdikige tutqunlarning mejburi emgekke séliniwatqanliqi ilgiri sürülmekte. “Jyafang kiyim-kéchek mehsulatlar baghchisi” 2017‏-yili 8‏-ayda qurulghan bolup, mezkur bazida hazirgha qeder tizimgha aldurghan xitayning shirketlirining sani 8 ge yétip barghan. Jyangsu ölkisidiki “Senrün guruhi” gha qarashliq “Shinjang shinyi senrün cheklik” shirkiti bu yil 9‏-ayda tizimgha aldurghan. Radiyomiz xitay bölümining 31‏-dékabir xewer qilishiche, mezkur ishlepchiqirish bazisidiki ishchilarning mutleq köp qismi yighiwélish lagérliridin kelgenler iken. Xewerde, bir yerlik musulman ahalisining sözi neqil keltürülgen. U, tutqunlarning herküni 12 sa'et ishleydighanliqi, ishtin chüshkendin kéyin yene bir sa'et siyasiy öginishke qatnishidighanliqini bildürgen. Uning ashkarilishiche, yéqinda bu bazigha 2000 dek musulman élip kélin'gen. Buningdin sel awwal ili téléwiziye istansisi xewer bérip, mezkur ishlepchiqirish bazisidiki bir kiyim-kéchek shirkitining 1500 kishini ishqa orunlashturghanliqini élan qilghan. Xewerde, bir yerlik ayalni ziyaret qilin'ghan bolup, u “Nurghun ademni ishqa élip bek yaxshi qildi. A'ilem méning bu yerde ishlishimni qollaydu. Men choqum yaxshi ishleymen” dégen. “Li jowen kiyim-kéchek ishlepchiqirish shirkiti” “Jyafang kiyim-kéchek mehsulatliri baghchisi” da tizimgha aldurghan karxanilarning biridur.

Ili téléwiziye istansisining xewiride qeyt qilinishiche, 2017‏-yili qurulghan mezkur karxana peley ishlepchiqirishni asas qilidiken we ishlepchiqirilghan mehsulati chet'ellerde we xitayning ichki bazirida sétilidiken. Mezkur xewer xelq'ara taratqularning diqqiti xitayning yighiwélish lagérliridiki Uyghur tutqunlarni lagérlarda yaki lagér etrapida zawut-karxanilarni qurup, mejburi emgekke séliwatqanliqigha da'ir uchurlargha qaritilghan mezgilde tarqaldi. 

Yéqinda birleshme agéntliqi “Teyda” namliq bir xitay shirkitining xotendiki lagérlarda zawut qurup, tutqunlarni mejburi emgekke séliwatqanliqini ashkarilighan. Bir amérika soda shirkitining bu lagérda ishlepchirilghan tenterbiye kiyimlirini import qilishi amérikida ghulghula qozghighan. Amérika tamozhna we chégra qoghdash idarisi amérikidiki bir shirketning xitayning xotendiki yighiwélish lagérlirida ishlepchiqirilghan kiyim-kécheklerni import qilip, amérika bazirigha salghanliqigha da'ir uchurlarni tekshürüshke bashlighanliqini bildürgen idi.