Xitay ömiki türkiye, ezerbeyjan we qazaqistanda lagérlarni aqlash pa'aliyiti élip bardi

Muxbirimiz shöhret hoshur
2018.10.31

Xitayning döletlik axbarat idarisi teshkilligen “Shinjang medeniyet almashturush ömiki” türkiyedin kéyin ‏-27 öktebir küni ezerbeyjanda, 31 ‏-öktebir küni qazaqistanda Uyghur diyaridiki yighiwélish lagérlirini aqlash pa'aliyiti élip bardi.

“Xitay axbarat tori” da bügün bu heqte élan qilin'ghan xewerdin melum bolushiche, mezkur ömektikiler ezerbeyjan we qazaqistandin ibaret ikki döletning medeniyet we axbarat sahesidiki alaqidar xadimlar söhbet yighini ötküzüp, xitayning “Bir yol bir belwagh” pilani hemde Uyghur rayonida élip bériwatqan atalmish “Kespiy terbiye herikiti” heqqide melumat bergen.

Mezkur ömek buning aldida oxshash pa'aliyetni istanbulda élip barghan we istanbuldiki yighinda türkiyening xitayning Uyghur rayonidiki siyasetlirini we qolgha keltürgen netijilirini toghra chüshürüshke dewet qilghan idi.

Xitayning bu heqtiki xewerliride mezkur ömekning teshwiqatigha qarita yighin ehlidin ijabiy inkaslarning bolghanliqi tilgha élin'ghan. Washin'gtonda yashawatqan siyasiy közetküchi memet sulayman ependi mezkur yighinlarda pütünley ijabiy inkaslarning chüshüshining mumkin emeslikini, xitayning tenqidiy pikirlerni yoshurghan bolushi éhtimalliqini ilgiri sürdi. Memet sulayman ependi yene nöwette yighiwélish lagérliri mesilide chet'eldiki Uyghur pa'aliyetchiliri we Uyghur himayichiliri bilen xitayning teshwiqat qoshuni arisida keskin bir küresh dawam qiliwatqanliqini, xitayning mezkur ömek arqiliq özlirining lagérlar heqqidiki hökümet izahatigha bu nöwet türk dunyasini qayil qilmaqchi boluwatqanliqini eskertti.

“Xitay axbarat tori” ning xewiride déyilishiche, mezkur ömek 22‏-öktebir küni atalmish “Medeniyet almashturush” sepirige atlan'ghan bolup, ularning bu qétimliq teshwiqat sepiri 10 künlük pilanlan'ghan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.