Хитай баш министири ли чяң уйғур диярида хизмәт тәкшүрүшидә болған

Вашингтондин мухбиримиз әркин тәйярлиди
2024.05.10

Хитай баш министири ли чяң 5-айниң 7-күнидин 9-күнигичә туюқсиз уйғур дияриға келип, үрүмчи, санҗи, “шинҗаң ишләпчиқириш қурулуш биңтүәни” ниң вуҗячү шәһири, алатав вә қорған еғизлирида тәкшүрүштә болған.

Хитай таратқулириниң хәвәрлиридә, ли чяңниң уйғур дияридики икки күнлүк тәкшүрүштә аталмиш “шинҗаң сиясити” гә аит нуқтилиқ икки сигнални бәргәнлики қәйт қилинмақта. Хитайдики “сина хәвәрлири” ниң көрситишичә, ли чяң уйғур диярини хитайниң “дөләт ичи вә сиртиға ечиветиш сәвийәсини техиму юқири көтүрүш”, мәзкур районда “байлиқ мәнбәсигә таянған алаһидилик вә әвзәлликкә игә игилик түрлирини йетиштүрүш һәм кеңәйтиш” ни оттуриға қойған.

Хитай таратқулири ли чяң уйғур дияридин айрилғандин кейинла униң районда тәкшүрүштә болғанлиқини андин хәвәр қилған. Хитай таратқулириниң немә үчүн буни ли чяң уйғур дияридин айрилғандин кейин хәвәр қилғанлиқи намәлум. Лекин ли чяңниң районда тәкшүрүштә болуши, ши җинпиңниң бу йил 23-апрел күни бейҗиңда ғәрбни кәң көләмдә ечиш сөһбәт йиғини чақирип, бәзи орунлаштурушларни елип бериши, шундақла америка ташқи ишлар министири билинкенниң йеқинда хитайни “уйғурларға ирқий қирғинчилиқ қилишни давамлаштурмақта” дәп әйиблишиниң арқисидинла елип берилған.

 “сина хәвәрлири” ниң билдүрүшичә, ли чяң уйғур диярида болған мәзгилдә, “баш секретар ши җинпиңниң йеңи дәврдики ғәрбни техиму кәң ечиветишни алға сүрүш сөһбәт йиғинида қилған муһим сөзиниң роһи вә партийәниң йеңи дәврдики шинҗаңни идарә қилиш истратегийәсини техиму чоңқур әмәлийләштүрүп, байлиқ мәнбәсигә таянған алаһидилик вә әвзәлликкә игә игилик түрлирини йетиштүрүш һәм кеңәйтиш; дөләт ичи вә сиртиға ечиветиш салмиқини юқири көтүрүш керәк” дегән. Униң көрситишичә, уйғур дияриниң хәлқара билән болған “сода, маарип, давалаш, мәдәнийәт вә саяһәтчилик җәһәтләрдики алақиси күчәйтилиши керәк” икән.

Хитай баш министири ли чяңниң хәлқарада хитайниң уйғур ирқий қирғинчилиқини җавабкарлиққа тартиш, мәҗбурий әмгәкни чәкләш чуқанлири давамлишиватқан бир пәйттә, уйғур дияриниң ишләпчиқириш түрлирини кеңәйтиш, сиртқа ечиветиш салмиқини юқири көтүрүшни оттуриға қоюши, диққәт қозғимақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.