Ma shingruy xoten rayonidiki qanun sistémisining muqimliq üchün qet'iy küresh qilishini tekitligen

Muxbirimiz eziz
2022-04-27
Share

Uyghur aptonom rayonlum partkomning sékrétari ma shingruy xoten wilayitining eng namrat nahiyeliridin bolghan kériye, niye we chira qatarliq jaylarda tekshürüshte bolghanda “Partiyemizning 20-qurultiyining ghelibilik échilishini kütüwélish üchün siyasiy muhitning saghlam bolushigha, muqimliqning yüksek siyasiy wezipe qatarida izchil dawam qilishigha mutleq képillik qilish” ni telep qilghan.

Xitay hökümiti bashqurishidiki “Tengritagh tori” ning 26-apréldiki xewiride éytilishche, ma shingruy herqaysi nahiyelerdiki jama'et xewpsizliki (j x), sot mehkimisi, teptish mehkimisi qatarliq orunlarning muqimliq üchün qiliwatqan xizmetlirini közdin kechürgen. Bu jeryanda “Shi jinpingning shinjang xizmiti heqqidiki muhim yolyoruqlirining rohini toluq emeliyleshtürüsh, shuningdek partiye merkiziy komitétining nöwettiki xeterge tolghan chong weziyet heqqidiki muhim hökümliri we xeterning aldini élishqa bolghan siyasiy xizmet teleplirini chongqur özleshtürüsh, shu arqiliq partiye merkiziy komitétining yéngi dewrdiki shinjangni idare qilish istratégiyesini toluq ijra qilish” lazimliqini alahide eskertken.

Xewerde éytilishiche, ma shingruy qanun sistémisidiki herqaysi orunlarni közdin kechürgende, ularning herqachan “Küresh qilish rohi we iradisini yüksek derijide ashurushi lazimliqini, ‍ashqunluq we térorluqqa qarshi küreshni qet'i boshashturmasliqni, chong zorawanliq weqelirining yüz bérishige héchqandaq yochuq qaldurmasliqni, dawamliq halda muqimliq xizmitini shinjangni güllendürüsh xizmitining aldinqi sherti qatarida ching tutush lazimliqini, shu arqiliq xelq ammisining xatirjemlik ichide turmush kechürishige képillik qilish lazimliqini” tepsiliy sherhilep ötken. Emma bu jeryanda xotendiki namratliq heqqide bir éghizmu söz qilmighan.

Analizchilar, xitay hökümiti tekitlewatqan “Xelq ammisining bixeterlik tuyghusi” ning emeliyette Uyghur diyarigha ghayet zor sanda köchürüp kéliniwatqan xitay aqqunlirigha qaritilghanliqini algha sürüp kelmekte idi. Ötken besh yilliq éghir basturush we qirghinchiliq jeryanida lagér sistémisi we mejburiy emgekning mislisiz omumlishishi ishqa ashqan, nechche milyon Uyghur lagérlargha qamilip boldi, dep qariliwatqan bir peytte, ma shingruyning dawamliq halda “Ashqunluq we térorluqqa qarshi küresh qilish rohini östürüsh” heqqide söz qilishi, Uyghur diyaridiki zulum we basturushning yéqin kelgüside téximu qattiq yosunda dawam qilidighanliqining bir bishariti, dep qaralmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet